Мечыслаў Эдвардавіч Часноўскі

Мечыслаў Эдвардавіч Часноўскі (18 мая 1948, в. Коцеўшчына, Валожынскі раён, Мінская вобласць — 17 кастрычніка 2021) — беларускі гісторык, дыпламат. Доктар гістарычных навук (2001). Рэктар Брэсцкага дзяржаўнага ўніверсітэта імя А. С. Пушкіна (2002—2014).

Мечыслаў Эдвардавіч Часноўскі
Дата нараджэння	18 мая 1948(1948-05-18)
Месца нараджэння	Коцеўшчына, Вішнеўскі сельсавет, Валожынскі раён, Маладзечанская вобласць, Беларуская ССР, СССР
Дата смерці	17 кастрычніка 2021(2021-10-17) (73 гады)
Месца пахавання	Качына
Грамадзянства	СССР  Беларусь
Род дзейнасці	дыпламат, гісторык
Навуковая сфера	гісторыя і міжнародныя адносіны
Месца працы	факультэт міжнародных адносін БДУ Брэсцкі дзяржаўны ўніверсітэт імя А. С. Пушкіна
Навуковая ступень	доктар гістарычных навук (2001)
Навуковае званне	прафесар
Альма-матар	гістарычны факультэт БДУ (1972) гістарычны факультэт БДУ
Партыя	КПСС
Узнагароды

У Вікіпедыі ёсць артыкулы пра іншых людзей з прозвішчам Часноўскі.

Біяграфія

Нарадзіўся 18 мая 1948 года ў в. Коцеўшчына Валожынскага раёна Мінскай вобласці ў сялянскай сям’і.

У 1972 годзе скончыў гістарычны факультэт Белдзяржуніверсітэта, дзе вучыўся разам з Пятром Краўчанкам. Працаваў дырэктарам 8-гадовай школы ў в. Гірбінята Валожынскага раёна^[1].

З 1975 года працаваў выкладчыкам у БДУ. Завочна закончыў аспірантуру. Кандыдат гістарычных навук з 1983 года. У 1985—1991 гадах быў дэканам факультэта павышэння кваліфікацыі БДУ. У 1987—1989 гадах адначасова з працай ва ўніверсітэце быў у выбарных органах КПБ. У 1991—1993 гадах працаваў намеснікам дэкана гістарычнага факультэта.

У 1993 годзе па прапанове Міністра замежных спраў Рэспублікі Беларусь Краўчанкі П. К. накіраваны на дыпламатычную работу ў Варшаву, дзе да 1996 года працаваў саветнікам, саветнікам-пасланнікам, Часовым павераным у справах Рэспублікі Беларусь у Рэспубліцы Польшча.

З 1996 года — зноў у БДУ. Адзін са стваральнікаў факультэта міжнародных адносін, намеснік дэкана, дацэнт, а з 2001 года — прафесар кафедры міжнародных адносін. З лістапада 2002 года па май 2014 года — рэктар Брэсцкага дзяржаўнага ўніверсітэта імя А. С. Пушкіна. Старшыня экспертнага савета ВАК Беларусі па гістарычнай галіне навукі.^[2]

У рамках міжнародных санкцый супраць рэжыму Лукашэнкі  (бел. (тар.)) ў Беларусі пасля здушэння апазіцыі пасля прэзідэнцкіх выбараў 2010 года Мечыслаў Часноўскі стаў суб’ектам забароны на паездкі і замарожвання актываў Еўрапейскім Саюзам як частка спісу беларускіх чыноўнікаў, адказных за палітычныя рэпрэсіі, падтасоўку вынікаў галасавання і прапаганду^[3][4]. У сваім рашэнні Еўрапейскі савет абвінаваціў Часноўскага ў «адлічэнні студэнтаў, якія ўдзельнічалі ў пратэстах пасля выбараў у снежні 2010 года»^[5].

Памёр 17 кастрычніка 2021 года^[6]. 21 кастрычніка пасля пахавальнай святой імшы і абрада развітання са спачылым у Чырвоным касцёле Мінска ён быў пахаваны на могілках каля в. Качына.

Сям’я

• Сын — Часноўскі Аляксандр Мечыслававіч — cаветнік-пасланнік Пасольства Рэспублікі Беларусь у Рэспубліцы Польшча^[7]

Выбраная бібліяграфія

• Постсацыялістычныя краіны на шляху пераўтварэнняў і еўрапейскай інтэграцыі: вучэбн. дапаможнік / М. Э. Часноўскі. — Мн.: Веды, 1997. — 120 с. — ISBN 985-6390-36-2.
• Эвалюцыя грамадскага ладу і міжнароднай палітыкі сучаснай Польшчы // Белорусский журнал международного права и международных отношений. — 1998. — № 2.
• Палітыка Расіі адносна краін Цэнтральнай і Усходняй Еўропы: погляд з Варшавы // Белорусский журнал международного права и международных отношений. — 1998. — № 4.
• Беларускі аспект усходняй палітыкі Польшчы ў 1996—1999 гг. // Белорусский журнал международного права и международных отношений. — 2000. — № 2.
• Праблема рэгіянальнай стабільнасці ў Цэнтральнай і Усходняй Еўропе ў канцы XX ст. // Белорусский журнал международного права и международных отношений. — 2000. — № 3.
• Еўрарэгіёны і іх роля ў постсацыялістычным развіцці краін Цэнтральнай і Усходняй Еўропы // Беларусь в современном мире: материалы I Республиканской научной конференции, 22—23 октября 2002 г. / редкол.: А. В. Шарапо [и др.]. — Минск: БГУ, 2003.

Узнагароды

• медаль «65 гадоў вызвалення Рэспублікі Беларусь ад нямецка-фашысцкіх захопнікаў»,
• медаль Францыска Скарыны (2011)^[8],
• нагрудны знак «Выдатнік адукацыі Рэспублікі Беларусь».