Мікалай Міхайлавіч Альшэўскі

У Вікіпедыі ёсць артыкулы пра іншых людзей з прозвішчам Альшэўскі.

Мікалай Міхайлавіч Альшэ́ўскі (27 студзеня 1919 — 22 жніўня 1944) — удзельнік Вялікай Айчыннай вайны, камандзір танка, малодшы лейтэнант. Герой Савецкага Саюза (1945).

Мікалай Міхайлавіч Альшэўскі
Дата нараджэння	27 студзеня 1919(1919-01-27)
Месца нараджэння	Сквіра, Сквірскі павет[d], Кіеўская губерня, Украінская Народная Рэспубліка
Дата смерці	22 жніўня 1944(1944-08-22) (25 гадоў)
Месца смерці	Літва
Месца пахавання	Антокальскія могілкі
Грамадзянства	СССР
Прыналежнасць	СССР
Род войскаў	танкавыя войскі
Гады службы	1940—1944
Званне	малодшы лейтэнант
Бітвы/войны	Вялікая Айчынная вайна
Узнагароды і званні
Медыяфайлы на Вікісховішчы

Біяграфія

М. М. Альшэўскі нарадзіўся ў горадзе Сквіра (зараз у Кіеўскай вобласці Украіны). Скончыў школу. У 1940 годзе прызваны на службу ў Чырвоную Армію. З 1941 года ўдзельнік баёў на Заходнім, Ленінградскім і 2-м Беларускім франтах.

Камандзір танка 26-й гвардзейскай танкавай брыгады (2-і танкавы корпус, 2-і Беларускі фронт) гвардыі малодшы лейтэнант Мікалай Міхайлавіч Альшэўскі асабліва вызначыўся пры вызваленні Віцебскай і Мінскай абласцей. Экіпаж пад яго камандаваннем 26 чэрвеня 1944 г. у баі каля вёскі Кісялі Талачынскага раёна знішчыў танк «тыгр», 4 гарматы і 8 аўтамашын з пяхотай праціўніка. На чыгуначнай станцыі Коханава Талачынскага раёна вызваліў больш за 150 савецкіх грамадзян. У ліпені 1944 года пры ліквідацыі варожай групоўкі ў мінскім «катле» экіпаж пад камандаваннем М. Альшэўскага знішчыў 2 танкі, 20 аўтамашын, 70 гітлераўцаў, узяў у палон больш за 200 салдат і афіцэраў праціўніка. У жніўні 1944 г. М. М. Альшэўскі быў цяжка паранены ў баі на тэрыторыі Літвы і памёр ад ран 22 жніўня. Пахаваны ў горадзе Вільнюс на Антакальніскіх могілках.

Званне Героя Савецкага Саюза М. М. Альшэўскаму прысвоена Указам Прэзідыума Вярхоўнага Савета СССР ад 24 сакавіка 1945 года пасмяротна.

Узнагароды

• Медаль «Залатая Зорка»
• Ордэн Леніна

Памяць

• У гонар М. М. Альшэўскага названа вуліца ў Фрунзенскім раёне горада Мінска^[1][2].
• Мемарыяльная дошка на доме № 1/4 па вуліцы Альшэўскага ў Мінску.

Зноскі

1. Іх імёнах названы вуліцы — Альшэўскі Мікалай Міхайлавіч (1919—1944)(недаступная спасылка) // Офіцыйны сайт Фрунзенскага раёна горада Мінска
2. Инфомация об улицах города Минска — Ольшевского улица(недаступная спасылка) (руск.) // Сайт Мінскага гарадскога выканаўчага камітэта