Міхась Кожыч (СВБ)

Міхась Кожыч (22 снежня 1924 — 23 кастрычніка 2013) — дзеяч беларускага нацыянальнага супраціву, адзін з кіраўнікоў падпольнага Саюзу вызвалення Беларусі ў Навагрудку ў 1946 г. Мянушка «Дубовы». ^[1]

Міхась Кожыч
Нараджэнне	22 снежня 1924(1924-12-22) Навагрудскі павет, Навагрудскае ваяводства, Польская Рэспубліка
Смерць	23 кастрычніка 2013(2013-10-23) (88 гадоў) Навагрудак, Навагрудскі раён, Гродзенская вобласць, Беларусь
Партыя	Беларуская незалежніцкая партыя
Член у	Саюз вызвалення Беларусі (1946—1947)

У Вікіпедыі ёсць артыкулы пра іншых людзей з імем Міхась Кожыч.

Біяграфія

Нарадзіўся 22 снежня 1924 г. у в. Паўберг Навагрудскага павета, Польшча. Падчас нямецкай акупацыі ў Другую сусветную вайну скончыў курсы для настаўнікаў у Навагрудку. Працаваў настаўнікам у роднай вёсцы Паўберг, пакуль у 1944 г. савецкія партызаны не спалілі школу. Пасля працаваў у паліклініцы ў Навагрудку, але летам таго ж года быў прызваны ў Чырвоную Армію. Ваяваў на Вісленскім плацдарме, фарсіраваў Одэр, быў цяжка паранены.

У 1946 г. уступіў у Саюз вызвалення беларусі, створаны па ініцыятыве Генадзя Казака, сябра Беларускай незалежніцкай партыі. Міхась Кожыч стаў адным з кіраўнікоў арганізацыі, узначальваў Арганізацыйны аддзел. Арганізацыю выдалі правакатары, і пад канец мая 1947 г. савецкія спецслужбы арыштавалі ў Баранавіцкім раёне 18 сяброў арганізацыі, сам Міхась Кожыч быў арыштаваны 30 мая. 30 жніўня 1947 г. ваенны суд прысудзіў дзеячаў арганізацыі на тэрмін ад 8 да 25 гадоў лагераў^[2]. Міхась Кожыч атрымаў 10 гадоў лагераў.

Пасля вызвалення працаваў будаўніком. Разам з сям’ёй вярнуўся з Казахстана ў Беларусь у 1960-х, жыў у Навагрудку.

У апошнія гады цяжка хварэў, быў прыкаваны да ложка. Памёр 23 кастрычніка 2013 г. Ён быў апошнім жыючым сябрам Саюза вызвалення Беларусі. Не быў реабілітаваны.

Зноскі

1. http://www.slounik.org/154826.html Біяграфія Міхася Кожыча
2. http://www.slounik.org/154980.html