Скарына (выдавецтва)

Выдавецтва «Скарына» (па-англійску: Skaryna ці Skaryna Press) — беларускае выдавецтва ў Лондане. Заснавана 6 жніўня 2022 беларускім і брытанскім выдаўцом, гісторыкам, бібліятэкарам Ігарам Івановым і яго аднадумцамі^[1]. Выдавецтва спецыялізуецца на беларускамоўнай літаратуры. У перспектыве выданне кніг на іншых мовах^[2].

Выдавецтва «Скарына»
Тып	выдавецтва
Заснаванне	6 жніўня 2022
Заснавальнікі	Ігар Іваноў
Размяшчэнне	Лондан, Вялікабрытанія
Адрас	Лондан
Ключавыя постаці	Ігар Іваноў, Караліна Мацкевіч, Ганна Комар, Таццяна Астроўская, Уладзіслаў Гарбацкі
Дэвіз	Кнігі ствараюць супольнасць
Сайт	skarynapress.com

У паняцця ёсць і іншыя значэнні, гл. Скарына.

Гісторыя

У беларускага замежжа — доўгая гісторыя і багатая традыцыя. Лондан займае асаблівае месца ў гэтай гісторыі: тут друкаваў кнігі Ян з Літвы, прыдумаў «ŭ» Аляксандр Рыпінскі, ствараў багатую літургічную спадчыну Аляксандр Надсан.

Выдавецтва «Скарына» было створана групай аднадумцаў у 2022 годзе, каб працягваць і ўзбагачаць гэтую традыцыю, адлюстроўваць патэнцыял беларускага замежжа, і наладжваць сувязі паміж аўтаркамі і чытацтвам у Беларусі і за яе межамі^[3].

Выдавецтва адрозніваецца мабільнасцю, часта наведвае свае чытацтва па свеце: у Польшчы, Літве, Германіі, Грузіі. Слоганам выдавецтва з’яўляецца выраз «Кнігі збіраюць супольнасць»^[4].

Першымі кнігамі «Скарыны» сталі паэтычны зборнік Ганны Комар «Мы вернемся» (гэты цудоўны паэтычны дакумент Беларусі 2022—2021 гадоў не мог выйсці ў Беларусі, таму рыхтаваўся маскоўскім выдавецтвам і быў падхоплены «Скарынай») і цудоўны пераклад украінскага тытана беларускага паходжання Агатангела Крымскага «Бейруцкія апавяданні»^[5].

Місія

На старонцы выдавецтва пазначаны тры галоўныя прынцыпы дзейнасці, своеасаблівая місія:

• Асветніцтва — жаданне казаць непрамоўленае або — наўмысна ці ненаўмысна — забытае, а таксама захоўваць, распаўсюджваць і памнажаць традыцыі і дасягненні, што ўзніклі ў беларускім замежжы;
• Супраціў цэнзуры і абмежаванням свабоды творчасці, каб быць пляцоўкай для вольнага абмену думкамі;
• Сучаснасць — ствараць і выдаваць кнігі па-новаму, тут і цяпер, каб яны разляталіся па ўсім беларускім сусвеце і жылі доўгім жыццём^[6].