Сямён Андрэевіч Самцэвіч

У Вікіпедыі ёсць артыкулы пра іншых людзей з прозвішчам Самцэвіч.

Сямён Андрэевіч Самцэ́віч (27 ліпеня 1902—30 мая 1985) — вучоны ў галіне мікрабіялогіі, доктар біялагічных навук (1954), прафесар (1956), член-карэспандэнт Акадэміі навук БССР (1967), заслужаны дзеяч навукі БССР (1977). Удзельнік Вялікай Айчыннай вайны.

Сямён Андрэевіч Самцэвіч
Дата нараджэння	27 ліпеня 1902(1902-07-27)
Месца нараджэння	Дакудава, Барысаўскі павет, Мінская губерня, Расійская імперыя
Дата смерці	30 мая 1985(1985-05-30) (82 гады)
Грамадзянства	Расійская імперыя  СССР
Род дзейнасці	навуковец
Навуковая сфера	мікрабіялогія
Месца працы	Інстытут біялагічных навук БССР, Інстытут эксперыментальнай батанікі АН БССР
Навуковая ступень	доктар біялагічных навук
Навуковае званне	прафесар, член-карэспандэнт АН БССР
Альма-матар	Горыгорацкі земляробчы інстытут
Партыя	КПСС
Узнагароды	Медаль «За працоўную адзнаку»

Біяграфія

Нарадзіўся ў вёсцы Дакудава Барысаўскага павета Мінскай губерні^[1] (зараз у Крупскім раёне Мінскай вобласці Беларусі). Скончыў Горацкае земляробча-агранамічнае вучылішча, у 1924 годзе — агранамічнае аддзяленне Горыгорацкага земляробчага інстытута (сучасная БДСГА). Працаваў кіраўніком саўгаса, раённым аграномам у Смілавіцкім раёне Мінскай вобласці. У 1934—1938 гг. старшы навуковы супрацоўнік у Інстытуце біялагічных навук акадэміі навук БССР, у 1938—1939 гг. ва Усесаюзным НДІ льну ў горадзе Таржок. У 1940 годзе С. А. Самцэвіч абараніў кандыдацкую дысертацыю і ўзначаліў кафедру фізіялогіі раслін і мікрабіялогіі Уманскага сельскагаспадарчага інстытута. У час Вялікай Айчыннай вайны ў РСЧА. Пасля дэмабілізацыі зноў працаваў у Уманскім сельскагаспадарчым інстытуце, потым кіраваў лабараторыяй мікрабіялогіі Інстытута лесаводства Акадэміі навук УССР. У 1954 годзе абараніў доктарскую дысертацыю. З 1964 года С. А. Самцэвіч у АН БССР — загадчык лабараторыі мікрабіялогіі Інстытута эксперыментальнай батанікі, кіраўнік Аддзела мікрабіялогіі (з 1975 г. Інстытут мікрабіялогіі АН БССР). У 1967 годзе С. А. Самцэвіч абраны членам-карэспандэнтам АН БССР.

Навуковая дзейнасць

С. А. Самцэвіч займаўся даследаваннямі ўзаемадзеянняў мікраарганізмаў, глебы і вышэйшых раслін, магчымасцей кіравання імі. Вывучаў прыроду сімбіёзу клубеньчыкавых бактэрый і бабовых раслін. Пад яго кіраўніцтвам падрыхтавана 22 кандыдаты і 1 доктар навук. З’яўляецца аўтарам 6 вынаходніцтваў і больш за 250 навуковых артыкулаў. Неаднаразова прымаў удзел у міжнародных кангрэсах і канферэнцыях. Быў абраны віцэ-прэзідэнтам Усесаюзнага таварыства мікрабіёлагаў і старшынёй яго Беларускага аддзялення, членам шэрагу навуковых саветаў.

Узнагароды

• Ордэн Чырвонай Зоркі
• Ордэн Працоўнага Чырвонага Сцяга
• Ордэн Айчыннай вайны 2-й ступені
• Медаль «За баявыя заслугі»
• Медаль «За працоўную адзнаку»
• Медаль «За перамогу над Германіяй у Вялікай Айчыннай вайне 1941—1945 гг.»
• Юбілейны медаль «Дваццаць гадоў Перамогі ў Вялікай Айчыннай вайне 1941—1945 гг.»
• Юбілейны медаль «Трыццаць гадоў Перамогі ў Вялікай Айчыннай вайне 1941—1945 гг.»
• Юбілейны медаль Луі Пастэра
• Ганаровая грамата Прэзідыума Вярхоўнага Савета БССР

Бібліяграфія

• Гелеобразные выделения корней растений и их значение в плодородии почвы, [Текст], [брошюра], Академия наук Белорусской ССР, Институт микробиологии Минск: Наука и техника, 1985. — 37, [1] с. — ил., табл.^[2]
• Использование микроорганизмов и их метаболитов в народном хозяйстве : [сборник статей] / Отд. микробиологии АН БССР, Белорус. микробиол. о-во
• Роль микроорганизмов в питании растений и плодородии почвы : [сборник статей] / АН БССР, Отд. микробиологии, Бел. отд-ние Всесоюзн. микробиол. о-ва
• Физиология и биохимия микроорганизмов : [сборник статей] / Отд. микробиологии АН БССР, Белорус. отд-ние Всесоюз. микробиол. о-ва
• Экология почвенных микроорганизмов : [сборник статей] / АН БССР, Отд. микробиологии
• Микроорганизмы — продуценты биологически активных веществ : [сборник статей] / Отд. микробиологии АН БССР, Белорус. микробиол. о-во
• Микроорганизмы почвы и растение : [сборник статей] / АН БССР, Отд. микробиологии

Зноскі

1. Этот день в истории 27 июля // СБ—Беларусь сегодня
2. Электронны каталог бібліятэкі БДТУ