Сяргей Аляксандравіч Габрусевіч

Сяргей Аляксандравіч Габрусе́віч (9 верасня 1936(1936-09-09), Верхаўляны, Беластоцкае ваяводства — 21 кастрычніка 2013(2013-10-21), Гродна) — беларускі філосаф. Кандыдат філасофскіх навук (1970), прафесар (1990).

Сяргей Аляксандравіч Габрусевіч
Дата нараджэння	9 верасня 1936(1936-09-09)
Месца нараджэння	Верхаўляны, Гміна Малая Бераставіца[d], Гродзенскі павет, Беластоцкае ваяводства, Польская Рэспубліка
Дата смерці	21 кастрычніка 2013(2013-10-21) (77 гадоў)
Месца смерці	Гродна, Гродзенская вобласць, Беларусь
Месца пахавання	Сакрэт
Род дзейнасці	філосаф
Месца працы	Гродзенскі дзяржаўны ўніверсітэт імя Янкі Купалы Беларускі фонд культуры
Навуковая ступень	кандыдат філасофскіх навук (1970)
Навуковае званне	прафесар
Альма-матар	гістарычны факультэт Гродзенскага педагагічнага інстытута імя Янкі Купалы (1965)
Узнагароды	Ганаровы прафесар Гродзенскага дзяржаўнага ўніверсітэта імя Янкі Купалы[d]

У Вікіпедыі ёсць артыкулы пра іншых людзей з прозвішчам Габрусевіч.

Біяграфія

Нарадзіўся 9 верасня 1936 г. у вёсцы Верхаўляны Бераставіцкага раёна Гродзенскай вобласці. Вышэйшую адукацыю атрымаў на гісторыка-філалагічным факультэце (рускае аддзяленне) Гродзенскага педагагічнага інстытута імя Янкі Купалы. Падчас вучобы ў 1962—1963 гадах узначальваў камітэт камсамола інстытута, працаваў лабарантам кафедры педагогікі. У 1964—1965 гадах, калі быў студэнтам дзённай формы навучання, загадваў вучэбнай часткай інстытута^[1].

Пасля заканчэння інстытута — асістэнт кафедры філасофіі і палітычнай эканоміі, аспірант кафедры дыялектычнага матэрыялізму Беларускага ўніверсітэта. Аспірантуру скончыў датэрмінова і ў 1970 годзе абараніў кандыдацкую дысертацыю «Развіццё У. І. Леніным марксісцкага вучэння аб практыцы як крытэрыі ісціны ў пазнанні сацыяльных з’яў». З восені 1969 — старшы выкладчык кафедры філасофіі і палітэканоміі. Вучонае званне дацэнта па кафедры філасофіі і палітычнай эканоміі прысвоена ў 1972 годзе. З 1973 года — загадчык кафедры методыкі камуністычнага выхавання, у 1974—1976 гадах — кафедры навуковага камунізму і палітэканоміі, у 1976—1986 гадах — прарэктар па навуковай працы, у 1986—1992 гадах — прарэктар па вучэбнай працы, у 1992—2002 гадах — прафесар кафедры беларускай культуры, у 2002—2007 гадах — загадчык кафедры беларускай культуры, прафесар кафедры беларускай культуры і рэгіянальнага турызму^[1].

Вучонае званне прафесара па кафедры сацыяльна-палітычных тэорый і паліталогіі прысвоена ў 1990 годзе^[1].

У 1990-я гады мінулага і пачатку гэтага стагоддзя С. А. Габрусевіч плённа працаваў на глебе нацыянальнай культуры. З’яўляўся членам Прэзідыума Беларускага Фонду культуры, старшынёй Гродзенскага абласнога аддзялення Беларускага Фонду культуры. У 1994—1995 гадах заснаваў і рэдагаваў гісторыка-культурны часопіс «Свіцязь», у якім друкаваліся матэрыялы па гісторыі культуры Гродзеншчыны і культуры беларускага замежжа^[1].

Член рэдкалегіі «Весніка ГрДУ імя Янкі Купалы», часопіса «Роднае слова», член Вучонага Савета ўніверсітэта і Савета аб’яднання кафедраў сацыяльна-гуманітарных навук^[1].

Званне Ганаровага прафесара Гродзенскага дзяржаўнага ўніверсітэта імя Янкі Купалы прысвоена ў 2006 годзе^[1].

Памёр 21 кастрычніка 2013 года^[1]. Пахаваны на могілках «Сакрэт» у Гродне^[2].

Навуковая дзейнасць

Аўтар больш за 100 навуковых прац па тэорыі пазнання, тэорыі і гісторыі беларускай культуры. Сярод навуковых прац прафесара С. А. Габрусевіча вылучаюцца манаграфіі «Гродна. Гістарычна-эканамічны нарыс», «Гродзенскі дзяржаўны Універсітэт імя Янкі Купалы», «Прафесар Ігнат Анацэвіч. Жыццё і спадчына», а таксама вучэбныя дапаможнікі «Ад дзелавой гульні да прафесійнай творчасці», «Педагагічная практыка студэнтаў», «Гісторыя беларускай культуры» і іншыя^[1].