Трайчаны

Трайчаны — прадмесце Слуцка, якое размяшчалася на левым беразе ракі Случ, на захад ад Старога горада. Паселішча ўзнікла вакол вядомага з XV ст. Траецкага манастыра, у які ўваходзілі дзве царквы — драўляная Благавешчання і мураваная Траецкая, а таксама келлі, жылыя дамы, сад, сажалка^[1]. Прадмесце Трайчаны кароткім участкам прылягала да абарончага пояса горада^[2]. Праз манастыр ад слуцкай Віленскай брамы праходзіла дарога да Нясвіжа, і далей да Вільні. Калі побач з манастыром вырасла прадмесце, адрэзак дарогі да горада стаў вуліцай Трайчанскай. Цяпер гэта жылы раён уздоўж вуліцы Віленскай ад Чортавага мосціка да медыцынскага каледжа^[3].

Слуцкі Троіцкі манастыр. Трайчаны. 1909 год.

Зноскі

1. Архітэктура Беларусі: Энцыклапедычны даведнік / Беларус. Энцыкл.; Рэкал.: А. А. Воінаў і інш. — Мн.: БелЭн, 1993. — 620 с. — 10 000 экз. — ISBN 5-85700-078-5.
2. Чантурыя. Горадабудаўнічае мастацтва Беларусі
3. Ігар Ціткоўскі. Манастыр на Трайчанах (нявызн.)(недаступная спасылка). Архівавана з першакрыніцы 9 сакавіка 2016. Праверана 19 лістапада 2015.