Уладзімір Мікалаевіч Вішнеўскі

У Вікіпедыі ёсць артыкулы пра іншых людзей з прозвішчам Вішнеўскі.

Уладзі́мір Мікала́евіч Вішне́ўскі (нар. 17 лютага 1955, Балотчыцы, Слуцкі раён) — беларускі мастак-графік, кніжны ілюстратар, жывапісец, скульптар, педагог.

Уладзімір Мікалаевіч Вішнеўскі
Дата нараджэння	17 лютага 1955(1955-02-17) (70 гадоў)
Месца нараджэння	Балотчыцы, Беліцкі сельсавет, Слуцкі раён, Мінская вобласць, Беларуская ССР, СССР
Грамадзянства	СССР  Беларусь
Род дзейнасці	графік, ілюстратар, скульптар
Месца працы	Беларуская дзяржаўная акадэмія мастацтваў
Жанр	партрэт, пейзаж, тэматычная карціна, кніжная ілюстрацыя
Вучоба	Рэспубліканская школа-інтэрнат па музыцы і выяўленчым мастацтве імя І. В. Ахрэмчыка (1973) Беларускі дзяржаўны тэатральна-мастацкі інстытут (1979)
Вядомыя працы	«Вянок беларускіх народных песень» (1988)
Уплыў	Пётр Свентахоўскі, Васіль Шаранговіч

Біяграфія

• 1966—1973 — вучыўся ў Рэспубліканскай школе-інтэрнаце па музыцы і выяўленчым мастацтве імя І. В. Ахрэмчыка.
• 1976 — пачаў браць удзел у мастацкіх выстаўках.
• 1979 — скончыў аддзяленне графікі Беларускага тэатральна-мастацкага інстытута. Настаўнікамі яго былі Пётр Свентахоўскі і Васіль Шаранговіч. З'яўляецца выдатным майстрам станковай і кніжнай графікі, працуе ў тэхніках афорта, літаграфіі, тэмперы.
• 1988 — уступіў у Беларускі саюз мастакоў.
• 1995 — атрымаў званне акадэміка графікі Беларускай акадэміі выяўленчага мастацтва.
• 1996 — стаў загадчыкам кафедры графікі факультэта выяўленчага мастацтва БДАМ

Творы

Мастацтвазнавец Ігар Ціткоўскі так характэрызуе творчасць мастака:

Адна з галоўных тэм, што прасочваецца ў творчасці Уладзіміра Вішнеўскага — барацьба дабра і зла. Менавіта раскрыццё гэтай тэмы надае яго кампазіцыям пачуццё дынамікі, унутранай напружанасці і драматызму. Сюжэты іх звычайна патрабуюць філасофскага, неадназначнага прачытання. Мастак карыстаецца мовай сімвалаў і алегорый, спалучае рэалістычную манеру з гратэскам. Кампазіцыі будуюцца на кантрастных супрацьпастаўленнях светлага і цёмнага, блізкага і дальняга планаў, ракурсаў. Абраная мастаком тэма звычайна раскрываецца ў серыях графічных лістоў. Сярод іх — серыі «Птушкаловы» (каляровы афорт, 1983), «Кірмаш спадзяванняў», «Пабудова чалавека» (1987), «Туга страчанага сусвету» (тэмпера, 1983)^[1].

Уладзімір Вішнеўскі з’яўляецца аўтарам ілюстрацый да кніг Уладзіміра Ягоўдзіка «Янка і ружа» (1992) і «Ці вернецца князь Кук?» (1993).

Аформіў кніжныя выданні Якуба Коласа, Кандрата Крапівы, Алеся Разанава, Максіма Лужаніна, Фёдара Дастаеўскага, Алаізы Пашкевіч (Цёткі).

За ілюстрацыі кніг «Вянок беларускіх народных песень» (Мн. 1988) і «Палата кнігапісная» Міколы Нікалаева (Мн. 1993) атрымаў дыпломы беларускіх рэспубліканскіх конкурсаў «Мастацтва кнігі».

Творы мастака знаходзяцца ў Нацыянальным мастацкім музеі Беларусі, Музеі сучаснага выяўленчага мастацтва ў Мінску, у прыватных зборах Беларусі і замежжа.

Выстаўкі

• 1990 — 1-я біенале графікі ў Калінінградзе, Расія
• 1991 — «Bieł Art. Панарама беларускага мастацтва», Варшава, Польшча
• 1996 — «Эстамп 96», Мінск
• «Сучасная беларуская графіка» (Цюрых, Швейцарыя)
• 2015 — «Будаўніцтва чалавека», Музей сучаснага выяўленчага мастацтва, Мінск^[2]

Зноскі

1. Ціткоўскі І. А. «Мастакі Случчыны». — Слуцк, 2006.
2. Музей сучаснага выяўленчага мастацтва(недаступная спасылка)