Уладзіслаў Высоцкі

У Вікіпедыі ёсць артыкулы пра іншых людзей з прозвішчам Высоцкі.

Уладзіслаў Высоцкі (польск.: Władysław Wysocki; 24 красавіка 1908 — 12 кастрычніка 1943) — удзельнік Вялікай Айчыннай вайны намеснік камандзіра 3-га батальёна 1-га пяхотнага палка 1-й польскай пяхотнай дывізіі імя Тадэвуша Касцюшкі ў складзе 33-й арміі Заходняга фронту, Герой Савецкага Саюза, капітан Войска Польскага^[1].

Уладзіслаў Высоцкі
польск.: Władysław Wysocki
Дата нараджэння	24 красавіка 1908(1908-04-24)
Месца нараджэння	Бельск, Бельскі павет, Гродзенская губерня, Літоўскае генерал-губернатарства, Расійская імперыя
Дата смерці	12 кастрычніка 1943(1943-10-12) (35 гадоў)
Месца смерці	Леніна, Ленінскі сельсавет, Горацкі раён, Магілёўская вобласць, Беларуская ССР, СССР
Грамадзянства	Польшча  Расійская імперыя
Прыналежнасць	Расійская імперыя,  Польшча
Род войскаў	пяхота
Гады службы	1939 — 1943
Званне	капітан
Бітвы/войны	Польская кампанія вермахта, Вялікая Айчынная вайна
Узнагароды і званні

Біяграфія

Нарадзіўся ў 1908 годзе ў Бельску, паляк^[1]. Пасля нападу фашысцкай Германіі на Польшчу і пачатку 2-й сусветнай вайны знаходзіўся ў Савецкім Саюзе, дзе пад камандаваннем генерала Зыгмунта Берлінга  (руск.) была сфарміравана з польскіх патрыётаў і ўзброеная савецкай баявой тэхнікай 1-я польская пяхотная дывізія імя Тадэвуша Касцюшкі  (руск.).

У другой палове 1943 года 1-я польская дывізія выступіла на фронт, дзе 12 кастрычніка 1943 ў складзе 33-й Арміі (Заходні фронт) атрымала баявое хрышчэнне ў бітве пад пасёлкам Леніна Горацкага раёна Магілёўскай вобласці^[1]. Гэтая дата пасля стала ў былой Польскай Народнай Рэспубліцы нацыянальным святам — Днём Войска Польскага.

12 кастрычніка 1943 года намеснік камандзіра^[1] 3-га батальёна (1-ы пяхотны полк) капітан Уладзіслаў Высоцкі са сваімі байцамі паспяхова авалодаў магутным вузлом супраціву праціўніка і захапіў першую лінію абароны гітлераўцаў, уклініўшыся ў другую ля в. Трагубава^[1]. Акружаны гітлераўцамі, каб не трапіць у палон, скончыў жыццё самагубствам^[1].

Узнагароды

Указам Прэзідыума Вярхоўнага Савета СССР ад 11 лістапада 1943 года за ўзорнае выкананне баявых заданняў камандавання на фронце барацьбы з нямецка-фашысцкімі захопнікамі і праяўленыя пры гэтым мужнасць і гераізм грамадзяніну Польшчы, капітану Высоцкаму Уладзіславу Казіміравічу пасмяротна прысвоена званне Героя Савецкага Саюза.

Узнагароджаны ордэнам Леніна.

Ушанаванне памяці

4 кастрычніка 1973 года Міністр абароны ПНР генерал Войцех Ярузельскі прысвоіў 1-му Пражскаму механізаванаму палку  (руск.) імя капітана Уладзіслава Высоцкага^[2].

У Бельск-Падляшскім, дзе нарадзіўся Уладзіслаў Высоцкі, яго імем названа вуліца. Пачатковая школа № 2, якая знаходзіцца на гэтай вуліцы, таксама носіць яго імя^[3]

Зноскі

1. Высоцкий Владислав // Биографический справочник. — Мн.: «Белорусская советская энциклопедия» имени Петруся Бровки, 1982. — Т. 5. — С. 130. — 737 с.
2. Rozkaz Nr 019/MON Ministra Obrony Narodowej z dnia 4 października 1973 roku w sprawie nadania jednostkom wojskowym historycznych nazw oraz imion zasłużonych działaczy partyjnych, żołnierzy oddziałów frontowych i partyzanckich, a także ustanowienia dorocznych świąt, Dziennik Rozkazów MON Tajny z 1973 r. Nr 10, poz. 26.
3. Szkoła Podstawowa Nr 2 im. kpt. Władysława Wysockiego, 17-100 Bielsk Podlaski, ul. Wł. Wysockiego 6. Архівавана 29 красавіка 2015. (польск.)