You Can’t Do That

«You Can’t Do That» (з англ. — «Ты не пасмееш», «Не смей») — песня англійскага рок-гурта «The Beatles», напісаная Джонам Ленанам^[3]. Упершыню песня выйшла ў альбоме «A Hard Day's Night». Яна была навеяна папулярнымі ў Мемфісе песнямі ў стылі рытм-энд-блюз і, як пазней пісаў музычны крытык Лестэр Бэнгс, «пабудавана на адным з самых вострых і незабыўных гітарных рыфаў з усіх, якія калі-небудзь сачыняліся»^[4]. З усіх песень на кружэлцы Джон Ленан больш за ўсё ганарыўся менавіта гэтай^[4].

You Can't Do That
Сінгл The Beatles з альбома A Hard Day's Night
Бок «А»	Can’t Buy Me Love
Бок «Б»	You Can’t Do That
Выпушчаны	16 сакавіка 1964 (ЗША) 20 сакавіка 1964 (Вялікабрытанія)
Мова	англійская[1]
Фармат	7”
Запісаны	29 студзеня 1964, «Эбі-Роўд»
Жанр	біт
Кампазітар	Ленан/Мак-Картні
Працягласць	2:34
Лэйбл	Capitol Records  ЗША Parlophone/EMI  Вялікабрытанія
Прадзюсар	Джордж Марцін
Аўтар песні	Джон Ленан[2] і Пол Мак-Картні[2]
Прафесійныя рэцэнзіі
Allmusic
The Beatles, храналогія сінглаў
«I Want to Hold Your Hand» (1963) «You Can't Do That» (1964) ««A Hard Day's Night» (1964)»

Кампазіцыя

Як і многія песні Джона Ленана, «You Can’t Do That» таксама аўтабіяграфічная. Роберт Сэндал напісаў пра яе:

«… ['You Can’t Do That] супярэчыла ветліваму тону з яго напружанымі пагрозамі. У ёй выразіліся сексуальная параноя і пакутлівы, пранізлівы рытм…»^[5]

Тэма рэўнасці, паднятая ў песні, таксама праявілася ў такіх кампазіцыях Ленана, як «Run for Your Life» і «Jealous Guy».

Песня пабудавана на дванаццаці тактавых рысах. Яна напісана пад уплывам музыкі малавядомага ў тыя гады спевака Уілсана Пікета^[3]. На акордзе D7 праяўляецца сінкапіраваны брэйк паміж вакальнымі фразамі — «I told you before» [брэйк] «you can’t do that»^[6].

У песні «You Can’t Do That» выкарыстоўваецца гітара Rickenbacker 360 Deluxe — электрычная 12-ціструнная гітара, купленая ў 1964 годзе за 900$ для Джорджа Харысана^[7]. Упершыню яе гучанне можна пачуць на запісе песні «Can’t Buy Me Love», а таксама на выступе падчас «Шоў Эда Салівана» ў Нью-Ёрку. Яе адметны і экстэнсіўны гук дакладна чуваць у LP-альбоме A Hard Day's Night. Гучанне гітары Харысана аказала моцны ўплыў на музыканта Роджэра Макгуіна, які пазней стварыў гурт «The Byrds»^[8].

Адначасова з пачаткам здымак фільма «Вечар цяжкага дня» рэжысёр фільма Рычард Лестэр патрабаваў ад гурта прадстаўлення арыгінальнага матэрыялу перад вытворчасцю. «You Can’t Do That» была выбрана The Beatles як адна з песень, якія павінны былі ўвайсці ў рэпертуар «жывога» выступу ў «Тэатры Скала» паводле сюжэту фільма. Але гэтая сцэна ў канчатковым варыянце ў карціну не ўвайшла.

Запіс і выпуск

«You Can’t Do That» была запісана ў аўторак 25 лютага 1964 года ў студыі «Эбі-Роўд» у Лондане^[9]. Песня была ўпершыню выпушчана як «Б»-бок брытанскага сінгла «Can’t Buy Me Love»^[10]. Пазней кампазіцыя ўвайшла ў трэк-ліст альбома A Hard Day's Night, выдадзенага ў Вялікабрытаніі, і альбома The Beatles' Second Album, выдадзенага ў ЗША^[10].

«The Beatles» запісалі «You Can’t Do That» чатыры разы для радыё «BBC» у 1964 годзе. Песня таксама ўвайшла ў рэпертуар «жывых» выступаў музыкантаў у тым жа годзе і стала другой кампазіцыяй у іх музычным сэце, пасля песні «Twist and Shout» — падчас аўстралійскіх і паўночнаамерыканскіх гастроляў гурта^[11]. Усяго было зроблена 9 дубляў запісу.

Пры стварэнні фільма «Вечар цяжкага дня» быў зняты эпізод, у якім «The Beatles» выконваюць песню «You Can’t Do That» у фінальнай сцэне фільма, калі гурт выступае на канцэрце перад аўдыторыяй. Здымкі адбываліся 31 сакавіка 1964 года ў «Тэатры Скала», у Лондане, але гэты эпізод не быў выкарыстаны ў фільме. Аднак відэазапіс, які не ўвайшоў у фільм, быў паказаны на «Шоў Эда Салівана» 24 мая^[11]. Сёння гэтае відэа можна ўбачыць у дакументальным фільме "Стварэнне фільма «Вечар цяжкага дня» (англ.: The Making of "A Hard Day's Night") на серверы YouTube.

Кавер-версіі

• Аманда Авермаер у сёмым сезоне папулярнага тэлешоў American Idol таксама зрабіла запіс песні ў больш паскораным тэмпе, пазней запісаўшы студыйную версію. Песня ўвайшла ў «топ 12» на шоў American Idol.
• The Supremes зрабілі кавер-версію песні для альбома 1964 года «A Bit of Liverpool».
• Аляксандр Пушны запісаў хіп-хоп версію песні.

Склад

• Джон Ленан — вядучы вакал, рытм-гітара і 6-ціструнная сола-гітара
• Пол Мак-Картні — бэк-вакал, бас-гітара, сенсера
• Джордж Харысан — бэк-вакал, 12-ціструнная сола-гітара
• Рынга Стар — барабаны, конга

Літаратура

• Hal Leonard Publishing Corporation (1993)
• The Beatles (2000) «Анталогія The Beatles», Сан-Францыска, «Chronicle Books». ISBN 0-8118-2684-8.
• Льюісан, М. (1988) «The Beatles: сесіі гуказапісу», Нью-Ёрк, «Harmony Books». ISBN 0-517-57066-1.
• Майлз, Б. (1997) «Пол Мак-Картні: Шмат гадоў таму», Нью-Ёрк, «Henry Holt & Company». ISBN 0-8050-5249-6.
• Макдональд, І. (2005) «Рэвалюцыя ў галаве: Запісы The Beatles і шасцідзясятыя», Лондан, Pimlico (Rand). ISBN 1-84413-828-3.
• Палмер, Т. (1977) «Усё, што табе патрэбна, — гэта каханне: Гісторыя папулярнай музыкі», Лондан: «Book Club Associates».
• Хары, Б. (1992) «Вялікая энцыклапедыя The Beatles», «Virgin Books». ISBN 0-86369-681-3.