Барыс Васілевіч Дзмітрыеў

У Вікіпедыі ёсць артыкулы пра іншых людзей з прозвішчам Дзмітрыеў.

Барыс Васілевіч Дзмітрыеў (руск.: Борис Васильевич Дмитриев; 9 мая 1925, в. Пятрова, цяпер Калужская вобласць, Расія — 15 лютага 2002, Калуга) — савецкі і расійскі мастак-жывапісец, рэстаўратар. Удзельнік Вялікай Айчыннай вайны. Першы паваенны рэстаўратар у Дзяржаўным мастацкім музеі БССР^[1].

Барыс Васілевіч Дзмітрыеў
Дата нараджэння	9 мая 1925(1925-05-09)
Месца нараджэння	Калужская вобласць
Дата смерці	15 лютага 2002(2002-02-15) (76 гадоў)
Месца смерці	Калуга, Калужская вобласць, Расія
Род дзейнасці	мастак, мастак-рэстаўратар
Месца працы	Калужскі абласны драматычны тэатр[d] Нацыянальны мастацкі музей Рэспублікі Беларусь Калужскі музей выяўленчых мастацтваў[d]
Жанр	пейзаж і нацюрморт
Вучоба	Усерасійскі мастацкі навукова-рэстаўрацыйны цэнтр імя акадэміка І. Э. Грабара[d]

Біяграфія

Нарадзіўся 9 мая 1925 года ў сялянскай сям’і ў вёсцы Пятрова (недалёка ад Калугі). У 1929 годзе сям’я пераехала ў Калугу, дзе Барыс скончыў школу і перажыў нямецкую акупацыю^[2].

У 1943 годзе прызваны ў Чырвоную армію, служыў у мінаметнай роце. У 1944 годзе падчас баёў за вызваленне Беларусі быў цяжка паранены, пасля чаго дэмабілізаваны па інваліднасці^[2].

Трудавы шлях пачаў у 1945 годзе мастаком-дэкаратарам у Калужскім драматычным тэатры. З 1950 года член таварыства «Калужскі мастак»^[2].

У 1955 годзе скончыў курсы рэстаўратараў пры Цэнтральных рэстаўрацыйных майстэрнях у Маскве. Пасля заканчэння курсаў на працягу пяці гадоў (1955—1960) працаваў рэстаўратарам у Дзяржаўным мастацкім музеі БССР у Мінску^[2]. Быў першым паваенным рэстаўратарам у музеі^[1]. За гэты час аднавіў шмат палотнаў розных мастакоў^[2].

У 1962 годзе вярнуўся ў Калугу, працаваў у майстэрні Калужскага аддзялення Мастацкага фонда. З красавіка 1969 года — мастак-рэстаўратар у Калужскім абласным мастацкім музеі. Займаўся рэстаўрацыяй тэмпернага жывапісу (ікон), алейнага жывапісу, графікі і роспісаў інтэр’ераў^[2].

Памёр у 2002 годзе^[2].

Творчасць

Працаваў пераважна ў жанрах пейзажа і нацюрморта. Творы мастака знаходзяцца ў зборы Калужскага музея выяўленчых мастацтваў і прыватных калекцыях^[2].

Выбраныя творы

• «Мінск. Сквер імя Янкі Купалы» (1960)
• Нацюрморт «Яблыкі» (1973)
• «Паўночны Каўказ. Вясна»
• «Летні дзень. Аўчурына» (1977)
• «Вуліца ў Тарусе»
• «Хлуднеўская цацка» (1991)

Рэстаўрацыйныя працы

Сярод адрэстаўраваных Барысам Дзмітрыевым твораў^[2]:

• Партрэт Кацярыны II (невядомы мастак канца XVIII ст.)
• Жаночы партрэт (П. Рышэ, XIX ст.)
• Партрэт невядомай (П. Шындлер, 1885)
• Ікона «Хрыстос і самаранка» (невядомы рускі майстар XVIII ст.)
• Ікона «Уваскрасенне Хрыстова з дванадзясятымі святамі» (1-я чвэрць XIX ст.)