Выдатнік адукацыі

Нагрудны знак Міністэрства адукацыі «Выдатнік адукацыі» — узнагарода Міністэрства адукацыі Рэспублікі Беларусь. Нагрудны знак заснаваны Указам Прэзідэнта Рэспублікі Беларусь ад 3 мая 2002 года № 238^[1].

Нагрудны знак Міністэрства адукацыі «Выдатнік адукацыі»
Арыгінальная назва	«Выдатнiк адукацыi»
Краіна	Беларусь
Тып	нагрудны знак
Каму ўручаецца	работнікі арганізацый сістэмы адукацыі Рэспублікі Беларусь; іншыя асобы за заслугі ў развіцці адукацыі
Кім уручаецца	Міністр адукацыі або яго намеснікі
Падставы ўзнагароджання	значны ўклад у развіццё адукацыі, укараненне перадавога педагагічнага вопыту, узорнае выкананне абавязкаў, высокія дасягненні ў навучанні і выхаванні, стаж не менш за 10 гадоў
Дата заснавання	3 мая 2002
Статус	уручаецца
Характарыстыкі
Матэрыял	метал жоўтага колеру, эмаль
Памеры	дыяметр 30 мм; калодка 12 × 25 мм

Статут

Нагрудным знакам узнагароджваюцца работнікі арганізацый сістэмы адукацыі, якія зрабілі значны ўклад у развіццё адукацыі, укараненне перадавога педагагічнага вопыту, узорна выконваюць працоўныя абавязкі, дасягнулі высокіх вынікаў у навучанні і выхаванні дзяцей і моладзі і маюць стаж працы ў гэтых арганізацыях не менш за 10 гадоў^[1].

Парадак прадстаўлення да ўзнагароды вызначаецца Міністрам адукацыі. Рашэнне аб узнагароджанні афармляецца загадам Міністра адукацыі^[1].

Знак і пасведчанне ўручаюцца ўрачыста Міністрам адукацыі або яго намеснікамі^[1].

Нагрудны знак можа быць адабраны ў выпадку ўчынення наўмыснага злачынства або грубага парушэння працоўнай дысцыпліны^[1].

Запісы пра ўзнагароджанне і пазбаўленне ўносяцца ў працоўную кніжку^[1].

Нагрудны знак носіцца на правым баку грудзей пасля ордэнаў і медалёў, а пры іх адсутнасці — на іх месцы^[1].

Паўторнае ўзнагароджанне не прадугледжана, дублікаты пры страце не выдаюцца^[1].

Апісанне

Нагрудны знак мае выгляд круга дыяметрам 30 мм. У цэнтры на фоне стылізаваных промняў узыходзячага сонца размешчаны адкрытая кніга, на правай старонцы якой намалявана славянская літара «А», і паходня, абрамленыя знізу дзвюма скрыжаванымі лаўровымі галінкамі. У верхняй частцы знака паўкругам размешчаны надпіс «Выдатнік адукацыі»^[1].

Знак пры дапамозе вушка і кольца злучаецца з прамавугольнай калодкай памерам 12 × 25 мм, на якой размешчана выява лаўровай галіны. Калодка пакрыта ювелірнай эмаллю чырвонага колеру^[1].

Знак і калодка вырабляюцца з металу жоўтага колеру. Адваротны бок знака мае гладкую паверхню з рэльефнай надпісам «МІНІСТЭРСТВА АДУКАЦЫІ РЭСПУБЛІКІ БЕЛАРУСЬ» у два радкі і пазнакай «№», пад якой гравіруецца парадкавы нумар узнагароды^[1].