Капліца Божай Міласэрнасці (Свяцк)

Капліца Божай Міласэрнасці — мураваны каталіцкі храм у вёсцы Свяцку Гродзенскага раёна, частка палацава-паркавага комплексу Валовічаў. Знаходзіцца ў заходняй ускраіне вёскі.

Каталіцкі храм
Капліца Божай Міласэрнасці
53°47′46,13″ пн. ш. 23°39′42,10″ у. д.HGЯO
Краіна	Беларусь
Вёска	Свяцк
Канфесія	Каталіцызм
Епархія	Гродзенская дыяцэзія
Дэканат	Сапоцкінскі
Тып будынка	капліца
Архітэктурны стыль	неаготыка
Дата пабудовы	1889 год
Статус	Гісторыка-культурная каштоўнасць Беларусі, шыфр 413Г00212шыфр 413Г00212

Гісторыя

Капліца пабудавана ў 1889 годзе з цэглы насупраць палаца Валовічаў як родавая пахавальня^[1].

За савецкім часам капліца не дзейнічала. Пасля асвячэння 6 жніўня 1996 года капліца была перададзена каталіцкай грамадзе парафіі касцёла Унебаўзяцця Найсвяцейшай Дзевы Марыі Сапоцкінскага дэканата^[2].

У 2007 годзе капліца ў складзе палацава-паркавага ансамбля была занесена ў Дзяржаўны спіс гісторыка-культурных каштоўнасцей Рэспублікі Беларусь як аб’ект гісторыка-культурнай спадчыны рэспубліканскага значэння.

28 студзеня 2020 года ў капліцы адбыўся пажар. Агнём была знішчаная мэбля, падлога, закураныя сцены і столь. Абыйшлося без пацярпелых^[3].

Архітэктура

Помнік архітэктуры неаготыкі^[4]. Уяўляе сабой кампактны і прыземісты кубападобны аб’ём з трохсценнай алтарнай часткай. Фасад вырашаны суцэльным двухгранным шчытом-вімпергам, сіметрычна расчлянёным трыма стральчатымі ўваходнымі і аконнымі праёмамі і крапаваным у тымпане круглай разеткай (імтацыяй гатычнага акна-ружы).

Спічастыя вокны на галоўным фасадзе разам са спічастым уваходным парталам ствараюць урачыстасць фасаду і імітуюць грандыёзную трохнефную базіліку. Гатычную вертыкальнасць будынку надае таксама высокі двухсхільны дах^[5].