Падручны польска-беларускі слоўнік

У паняцця ёсць і іншыя значэнні, гл. Польска-беларускі слоўнік (значэнні).

Падру́чны по́льска-белару́скі сло́ўнік (ППБС-62) — двухмоўны перакладны слоўнік, выдадзены ў 1962 годзе ў Варшаве. Галоўныя рэдактары — Антаніна Абрэмбская-Яблонская і Мікалай Бірыла^[1]. Налічвае каля 40 000 слоў^[2].

Падручны польска-беларускі слоўнік
Мова арыгінала	беларуская і польская
Выдавецтва	Wiedza Powszechna[d]
Выпуск	1962
Месца публікацыі	Варшава
Старонак	1 084

Укладанне

Работа над слоўнікам пачалася ў 1955 годзе ў сектары беларускай філалогіі пры Польска-савецкім інстытуце (ВД). Кіравала працай загадчыца кафедры беларускай філалогіі Варшаўскага ўніверсітэта прафесарка Антаніна Абрэмбская-Яблонская, бралі ўдзел таксама супрацоўнікі сектару беларускай філалогіі Польска-савецкага інстытута і кафедры беларускай філалогіі Варшаўскага ўніверсітэта Лідзія Базылюк, Лідзія Галавінская, Ларыса Гутнік, Барыс Мерынг і Баляслаў Манкевіч. З беларускага боку ўдзельнічаў мовазнавец акадэмік Мікалай Бірыла, які ў той час працаваў загадчыкам сектара тэрміналогіі Інстытута мовазнаўства Акадэміі навук БССР і чытаў лекцыі па беларускай мове ў Варшаўскім універсітэце. Але і пасля вяртання ў Беларусь ён працягваў удзел у працы над слоўнікам па пошце^[3].

Бібліяграфія

• Падручны польска-беларускі слоўнік = Podręczny słownik polsko-białoruski / пад рэдакцыяй А. Обрэмбскай-Яблонскай і М. Бірылы. — Wydanie I. — Варшава: Ведза Повшэхна, 1962. — 1084 + XVI с. — 5 000 + 203 экз.