From Wikipedia, the free encyclopedia
Камала Дэйві Харыс (англ.: Kamala Devi Harris; нар. 20 кастрычніка 1964, Окленд, Каліфорнія) — амерыканская юрыстка і палітычная дзяячка, якая прадстаўляе Дэмакратычную партыю. Сенатар ЗША ад Каліфорніі з 2017 года; перад гэтым — генеральны пракурор Каліфорніі (з 2011 па 2017 гады), і акруговы пракурор Сан-Францыска (з 2004 да 2011 года), віцэ-прэзідэнт ЗША з 20 студзеня 2021 года.
Нарадзілася 20 кастрычніка 1964 года ў Оклендзе (штат Каліфорнія) у сям’і імігрантаў. Яе маці — ураджэнка Індыі — займалася біямедыцынскімі даследаваннямі, бацька родам з Ямайкі, эканаміст.
У 1986 годзе скончыла Говардскі ўніверсітэт у Вашынгтоне (акруга Калумбія) са ступенню бакалаўра эканомікі і палітычных навук, пасля чаго працавала памочнікам у апараце сенатара-дэмакрата Алана Крэнстана. У час вучобы была членам жаночага афраамерыканскага студэнцкага таварыства, удзельнічала ва ўніверсітэцкіх дэбатах, выступала за роўныя грамадзянскія правы і супраць апартэіду ў ПАР. У 1989 годзе Камала Харыс атрымала юрыдычную адукацыю ў Каліфарнійскім універсітэце. У 1990 годзе ўвайшла ў калегію адвакатаў штата Каліфорнія.
У 1990 годзе заняла пасаду намесніка пракурора ў акрузе Аламіда ў штаце Каліфорнія. У 1994 годзе стала членам Апеляцыйнай рады па страхаванні ад беспрацоўя гэтага штата, а затым — Камісіі па медыцынскай дапамозе штата. У 1998 годзе была прызначаная памочніцай акруговага пракурора Сан-Францыска, кіравала аддзелам па рабоце з рэцыдывістамі. У 2000 годзе перайшла ў мэрыю Сан-Францыска, дзе ўзначальвала аддзел па справах сям’і і дзяцей, які разглядае справы аб беспрытульніках, а таксама аб жорсткім абыходжанні з дзецьмі.
У 2003 годзе Камала Харыс была абраная акруговым пракурорам Сан-Францыска, на гэтай пасадзе яна знаходзілася з 2004 па 2011 год. У 2010 годзе яе абралі генеральным пракурорам штата Каліфорнія, уступіла на пасаду ў 2011 годзе і займала яе да 2017 года. Асаблівую ўвагу на гэтых пасадах яна ўдзяляла павышэнню празрыстасці праваахоўных органаў і расследаванням выпадкаў перавышэння іх паўнамоцтваў, а таксама абароне навакольнага асяроддзя і правоў сэкс-меншасцей, прасоўванню патранатных сем’яў (якія атрымліваюць дапамогу ад дзяржавы за выхаванне прыёмных дзяцей). Працуючы ў Каліфорніі, яна цесна супрацоўнічала з Бо Байдэнам, сынам Джо Байдэна, які займаў у 2007—2015 гадах пост генеральнага пракурора штата Дэлавэр.
У 2015 годзе Камала Харыс аб’явіла аб намеры балатавацца на пасаду сенатара ад Каліфорніі. У 2016 годзе яна выйграла праймерыз Дэмакратычнай партыі штата і ў тым жа годзе была абраная ў Сенат ЗША. Уваходзіла ў склад юрыдычнага камітэта, камітэтаў па разведцы, па бюджэце і па ўнутранай бяспецы, па справах урада.
Выступала з рэзкай крытыкай Прэзідэнта ЗША Дональда Трампа (2017—2021), крытыкавала яго адміністрацыю за выхад з пагаднення з Іранам, якое абмяжоўваў ядзерныя распрацоўкі ў абмен на зняцце санкцый, і заключэнне гандлёвага пагаднення з Кітаем.
Неаднаразова выступала з жорсткіх антырасійскіх пазіцый, у чэрвені 2017 года прагаласавала за закон «Аб супрацьдзеянні супернікам Амерыкі праз санкцыі». Аднак падтрымлівала падаўжэнне да 2026 года заключанага ў 2010 годзе амерыкана-расійскага Дагавора па скарачэнні стратэгічных наступальных узбраенняў і выказвалася супраць выхаду з Дагавора аб ліквідацыі ракет сярэдняй і меншай далёкасці.
У студзені 2019 года Камала Харыс абвясціла аб удзеле ў прэзідэнцкіх выбарах у Злучаных Штатах у 2020 годзе, аднак у снежні 2019 года, яшчэ да першых праймерыз, зняла сваю кандыдатуру. Неўзабаве яна заклікала сваіх прыхільнікаў галасаваць за Джо Байдэна. У лістападзе Джо Байдэн і Камала Харыс, якая балатавалася ў звязку з ім як кандыдат на пасаду віцэ-прэзідэнта, атрымалі перамогу над рэспубліканцамі Дональдам Трампам і Майкам Пенсам. 18 студзеня 2021 года, за два дні да інаўгурацыі, Харыс склала з сябе паўнамоцтвы сенатара. Яна стала першай жанчынай, першай афраамерыканкай і першай амерыканкай азіяцкага паходжання на пасадзе віцэ-прэзідэнта.
10 снежна 2020 абраны прэзідэнт ЗША Джо Байдэн і яго напарніца па перадвыбарнай гонцы Камала Харыс названы ўладальнікамі звання «Чалавек года» па версіі часопіса «Time».
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.