Santu Casanova

Santu Casanova (Azzana, 3 di lugliu 1850 - Livornu, 27 di dicembre 1936) fù un scrittore in lingua corsa, unu di i babbi di a literatura corsa muderna.

Ritrattu di Santu Casanova in L'Annu Corsu per u 1927

Biugrafia

U paese d'Arburi incù i so dui paisoli: Mercolaccia inghjò è Parapoghju insù

Santu Casanova nascì u 3 di lugliu di u 1850 in Azzana, da una famiglia da Riventosa e d'Arburi.

Santu Casanova cuminciò à scrive in talianu, è si staccanu l'opare Meraviglioso Testamento di Francesco, Morto in Cargese il 18 Maggio 1875 in lu 1876, Contrasto Curioso fra un Guagnese e un Chiglianese in lu 1876 è La Morte e i Funerali di Spanetto, in lu 1892.

In soprapiù fundò in u 1889, u prima ghjurnale in lingua corsa : "A Tramuntanella, Fresca è Zitella". Divinterà in u 1896 A Tramuntana (u titulu longu essendu "A Tramuntana, Fresca è Sana"), un sittimanale sataricu in lingua corsa chì averà assai successu è chì serà publicatu sin'à u 1914. A rivista tratta di tutti i sughjetti: ecunomichi, suciali, scentificichi, literarii, pulitichi. Fin'à a so morte, Santu Casanova hè statu u dirittore di A Tramuntana, in chì avarà pruvatu à fissà l'ortograffia di u corsu. Firmava l'articuli è i testi cù unu di i pseudonimi: Ziu Santu, U Monacu, U Piligrinu, U Gobbu, U Paisanu. Ind'è sta rivista sò stati publicati tutti i vinturi autori in lingua corsa, frà quelli Petru Rocca.

Dopu guerra, cuntinuò di prumove a lingua corsa, per via di l'associu A Lingua Corsa chì fù fundata in u 1921.^[1] Publicò dinù in Bastia in u 1927 una raccolta di raconti è testi in prosa intitulata Primavera Corsa è una raccolta di puesie di prima trinca: Fiori di Cirnu, in u 1930.

Hè statu suspittatu è ancu accusatu d'esse irridintistu à a fine di a so vita^[2].

Santu Casanova morse in Livornu in u 1936. Ma e so cennere funu cullucate in u so paese d'Arburi in u 1962.

Opari

A cuprendula di Primavera Corsa, publicata in Bastia in u 1927

In talianu

• Meraviglioso Testamento di Francesco, Morto in Cargese il 18 Maggio 1875 (1876).
• Dialetto Corso (1876).
• Contrasto Curioso fra un Guagnese e un Chiglianese (1876).
• La Morte e i Funerali di Spanetto (1892): cumpostu da 125 sistini.

In corsu

Puesia

• Fiori di Cirnu: publicatu in u 1930, cumprende L'invernu in Corsica, Cantu di malincunia, Corsica Ponte Novu.
• A primavera in Arburi: publicatu in L'Annu Corsu in u 1923.
• Corsica publicatu in u 1931 in l'Almanaccu populare di Corsica.

Prosa

• L'urticellu: publicatu in L'Annu Corsu in u 1924.
• A Lingua Corsa: publicatu in Primavera Corsa in u 1927.
• Tiadoru Poli, banditu: publicatu in L'Annu Corsu in u 1932.

Teatru

• Dialogu di Petru è Martinu: una scenetta publicata u 12 ghjugnu di u 1892 cù u pseudonimu di Brandu, in u ghjurnale bunapartistu Le Drapeau, chì era direttu tandu da l'avvucatu Francescu Nicoli.