Economi Simbabwe

Un o economïau gwanaf y byd yw economi Simbabwe; mae'n methu dan bwysau camreolaeth economaidd, gyda lefel diweithdra o 85% a gorchwyddiant argyfyngus. Er yr oedd yn arfer bod ymhlith economïau cryfaf Affrica, dioddefodd yr economi drawsnewidiad gwael dan arweinyddiaeth yr Arlywydd Robert Mugabe. Mae gan Simbabwe lefel chwyddiant uchaf y byd, sef dros 10,000,000% (mae'n amhosib i gyfrifo gwerth manwl gywir); yr ail uchaf yw Myanmar gyda 34.4%.^[1] Mae'r sefyllfa economaidd yn effeithio'n ddifrifol ar safonau byw pobl Simbabwe, ac mae pryderon gan y Cenhedloedd Unedig y gall prinder bwyd mewn siopau oherwydd gorchwyddiant a llesgedd y llywodraeth wrth ddiwygio tir achosi newyn.^[2]