Baciláceas

As baciláceas (Bacillaceae) son unha familia de bacterias grampositivas, heterótrofas, con forma típica de bacilo, que poden producir endósporas.^[1] Os membros con motilidade desta familia caracterízanse por ter unha flaxelación peritrica (moitos flaxelos situados arredor de toda a célula). Algunhas Bacillaceae son aerobias, mentres que outras son anaerobias facultativas ou anaerobias estritas. A maioría das especies non son patóxenas, pero no xénero Bacillus hai especies que causan enfermidades en humanos, como B. anthracis.

Bacillaceae
Bacillus subtilis, con tinguidura de Gram
Clasificación científica
Dominio: Bacteria División: Firmicutes Clase: Bacilli Orde: Bacillales Familia: Bacillaceae Garrity et al. 2001
Xéneros
Alkalibacillus Amphibacillus Anoxybacillus Bacillus Caldalkalibacillus Cerasibacillus Exiguobacterium Filobacillus Geobacillus Gracilibacillus Halalkalibacillus Halobacillus Halolactibacillus Jeotgalibacillus Lentibacillus Lysinibacillus Marinibacillus Oceanobacillus Ornithinibacillus Paraliobacillus Paucisalibacillus Pelagibacillus Piscibacillus Pontibacillus Saccharococcus Salibacillus Salimicrobium Salinibacillus Salirhabdus Salsuginibacillus Tenuibacillus Terribacillus Thalassobacillus Ureibacillus Virgibacillus Vulcanibacillus

Aínda que as baciláceas son tipicamente bacilos, hai unha excepción, o xénero Saccharococcus^[2], que son cocos que foron illados na extracción do azucre de remolacha.^[3]

Forma de vida

Nesta familia hai especies útiles, como as que se empregan no tratamento do liño e outras patóxenas para o home e animais, como Bacillus anthracis. Todas as Bacillaceae presentan o mesmo modo de vida. Na natureza, sobre todo no solo, existe unha grande reserva de esporas en estado de latencia. Se pola presenza de alimento adecuado se induce a xerminación dunha espora, pode producirse unha rápida multiplicación ata que se esgota o alimento; entón poden formarse de novo esporas que pasan a incrementar a reserva natural. Esta breve fase de multiplicación ten lugar nos restos de animais e vexetais e nos alimentos e tecidos animais como ocorre nas especies patóxenas.