Carelia

Carelia (en carelio, finés e estoniano: Karjala; ruso: Карелия, Karelija, historicamente Корела, Korjela; sueco: Karelen), a terra do pobo carelio, é unha rexión da Europa setentrional de importancia histórica para Finlandia, Rusia e Suecia. Actualmente a rexión está dividida entre Finlandia (formando as rexións de Carelia do Norte e Carelia do Sur), e o noroeste de Rusia (formando os suxeitos federais da República de Carelia e o óblast de Leningrado).

Carelia

Localización
63°N 32°L
Estado	Rusia
República	República de Carelia
Xeografía
Bañado por	Mar Báltico, Mar Branco, Lago Onega, Lago Ladoga e Golfo de Finlandia

Mapa das rexións tradicionais de Carelia.

Historia

Artigo principal: Historia de Carelia.

As primeiras probas de presenza humana na rexión datan da idade do xeo, aproximadamente 7 ou 6 milenios AEC, e adicábanse á caza e á pesca. Tratábase de tribos fino-ugrias (Korela, Sum, Ves e Saami) que habitaron as áreas do istmo de Carelia e o norte do lago Ladoga, entre este e o lago Onega (Ves), e máis ao norte (Saami), mais posteriormente estendéronse ata a costa do mar Branco, ao mesmo tempo que tribos eslavas penetraron neses territorios e axudaron no desenvolvemento de actividades como a agricultura e o comercio marítimo. No primeiro milenio AEC as persoas que habitaban a rexión puideron extraer e procesar o ferro, así como cultivar e criar gando.^[1]

Política

Véxase tamén: Cuestión de Carelia.

Sede do Parlamento da República de Carelia.

Carelia encóntrase politicamente dividida entre Finlandia e Rusia. A República de Carelia é un suxeito federal constituído como tal en 1991 a partir da República Autónoma Socialista Soviética de Carelia.^[2] O istmo de Carelia pretence administrativamente ao óblast de Leningrado,^[3] logo de que Finlandia cedera o territorio logo da Guerra de Inverno en 1940.^[4] A parte finlandesa consiste en partes das rexións (en finés maakunta) de Carelia do Norte e Carelia do Sur.^[5]

Lingua

Artigo principal: Lingua carelia.

A lingua carelia é a lingua propia do pobo carelio. Trátase dunha lingua urálica da pola das linguas fino-bálticas estreitamente relacionada co finés.^[6]

Calcúlase que hai un total de 30 000 falantes de carelio,^[7] con todo, debido ás migracións posteriores á segunda guerra mundial o pobo carelio vive disperso por toda Finlandia e o carelio non é falado como idioma comunitario local.^[8]