Carioferina

As carioferinas son un grupo de proteínas implicadas no transporte de moléculas entre o citoplasma e o núcleo celular das células eucariotas. O transporte, mediado por unhas proteínas de transporte chamadas carioferinas, ten lugar a través dos poros nucleares, que actúan como unha porta para entrar e saír do núcleo. A maioría das proteínas necesitan as carioferinas para poder atravesar os poros nucleares.

Carioferina (importina) beta 1. PDB 1f59

As carioferinas poden actuar como importinas (que axudan ás proteínas a entrar no núcleo) ou exportinas (que as axudan a saír do núcleo). Forman parte da Familia do Complexo do Poro Nuclear de proteínas^[1] na base de datos de clasificación de transportadores (TCDB, transporter classification database).

A enerxía para o transporte destas moléculas deriva do gradiente Ran.

Importina beta

Un exemplo de carioferina é a importina beta. A importina beta é un tipo específico de carioferina que facilita o transporte de cargamentos de proteínas ao interior do núcleo. Para facelo, primeiramente únese á importina alfa (outro tipo de carioferina que se une á proteína a transportar no citoplasma), e despois a proteína a transportar é importada ao interior do núcleo a través dun poro nuclear usando a enerxía derivada do gradiente Ran. Unha vez dentro do núcleo, o cargamento transportado disóciase das carioferinas.

A importina beta pode tamén transportar proteínas ao núcleo sen a axuda da proteína adaptadora importina.^[2]

Xenes humanos da familia da carioferina

Ciclo Ran-GTP.

• KPNA1
• KPNA2
• KPNA3
• KPNA4
• KPNA5
• KPNA6
• KPNB1
• CRM1