Dendrobranquiados

A dos dendrobranquiados (Dendrobranchiata) é unha suborde de crustáceos decápodos coñecidos como gambas, e como lagostinos os de maior tamaño, dos que están descritas 540 especies reunidas en sete familias, e cun rexistro fósil que se estende até o período devoniano.

Dendrobranquiados Dendrobranchiata Rango fósil: Devoniano tardío - actualidade
Penaeus monodon
Clasificación científica
Reino: Animalia Filo: Arthropoda Subfilo: Crustacea Clase: Malacostraca Orde: Decapoda Suborde: Dendrobranchiata Bate, 1888
Superfamilias
Penaeoidea Sergestoidea
Sinonimia [1]
Penaeidea Dana, 1852

Gamba branca (Parapenaues longirostris).

Litopenaeus setiferus, unha gamba norteamericana.

Diferéncianse doutros animais relacionados, tales como os Caridea (os camaróns) e os Stenopodidea (os chamados camarões limpadores en portugués), pola forma en que se ramifican as branquias (ao que deben o seu nome)^[2] e polo feito de que as femias non incuban os ovos, senón que os liberan directamente na auga.

Teñen o terceiro par de pereiópodos quelado, coa excepción dalgunhas especies que o presentan reducido, e a pleura do segundo somito do abdome non se sobrepón á do primeiro.

Saen do ovo con forma nauplius e pasan no seu desenvolvemento polas fases larvais de protozoea, zoea e poslarva.^[3]

De pequeno tamaño, poden alcanzar unha lonxitude de até 330 mm, e unha masa de até 450 g, e son amplamente pescados e criados para o consumo humano.

Taxonomía

Superfamilia Penaeoidea Rafinesque-Schmaltz, 1815

• Familia Aciculopodidae † Feldmann & Schweitzer, 2010 Unha única especie do Devoniano:
  • Xénero Aciculopoda
    • Aciculopoda mapesi ^[4]
• Familia Aegeridae † Burkenroad, 1963 con 2 xéneros do Mesozoico:
  • Aeger^[5]
  • Acanthochirana ^[5]
• Familia Aristeidae Wood-Mason, 1891 con 26 especies viventes en 9 xéneros, e un xénero fósil ^[6]
• Familia Benthesicymidae Wood-Mason, 1891 con 41 especies en 4 xéneros ^[6]
• Familia Carpopenaeidae † Garassino, 1994 con 2 especies do cretáceo no
  • Xénero Carpopenaeus ^[7]
• Familia Penaeidae Rafinesque-Schmaltz, 1815 con 216 especies viventes en 26 xéneros, e varios xéneros extintos, os máis deles do Mesozoico ^[8]
• Familia Sicyoniidae Ortmann, 1898 con 43 especies no
  • Xénero Sicyonia ^[9]
• Familia Solenoceridae Wood-Mason, 1891 con 81 especies en 9 xéneros ^[10]

Superfamilia Sergestoidea Dana, 1852

• Familia Luciferidae De Haan, 1849 con 7 especies do
  • Xénero Lucifer ^[10]
• Familia Sergestidae Dana, 1852 con 90 especies vivas en 6 xéneros, e dous xéneros monotípicos extintos.^[11]