Galaxy Evolution Explorer

Galaxy Evolution Explorer, máis coñecido polo seu acrónimo GALEX e tamén nomeado como Explorer 83, é un observatorio espacial da NASA pertencente ó programa Explorer lanzado o 28 de abril de 2003 desde Cabo Cañaveral mediante un foguete Pegasus XL.^[2][4]

Galaxy Evolution Explorer (GALEX)
Representación de GALEX.
Tipo	Observatorio espacial.
Organización	NASA
Satélite de	Terra
Data de lanzamento	28 de abril de 2003[1][2][3]
Foguete portador	Pegasus XL[2][4]
Sitio de lanzamento	Cabo Cañaveral[2][5]
Obxectivo da misión	Observación astronómica no ultravioleta.[2][5]
NSSDC ID	2003-017A
Masa	280 kg[2][4][5]
Potencia	290 vatios[2][5]
Datos orbitais
Semieixo maior	7070,6 km[1]
Inclinación	29 graos[1]
Apoapse	702,4 km[1]
Periapse	696,8 km[1]
v c e

Características

A misión de GALEX é observar o ceo na banda ultravioleta para estudar a orixe e evolución das galaxias e a orixe das estrelas e os elementos pesados no rango do corremento ao roxo (z) entre 0 e 2.^[2][4]

O satélite estabilízase nos tres eixos e a alimentación eléctrica é proporcionada por catro paneis solares fixos con células de arseniuro de galio. O bus está baseado no OrbView 4 da empresa Orbital Sciences.^[2][5]

As comunicacións teñen lugar mediante unha ligazón en banda X cunha velocidade de descarga de ata 25 Mbps. Úsase a banda S para enviar comandos cara ao satélite e para obter datos de mantemento, cunha velocidade de ata 2 Mbps.

A galaxia de Andrómeda observada no ultravioleta por GALEX.

Instrumentos

GALEX usa un telescopio de 50 cm de apertura de tipo Ritchey-Chretien que encamiña a luz a un par de sensores capaces de observar no rango de lonxitudes de onda de 175 a 280 nanómetros e no rango de 135 a 174 nanómetros.^[2][5]