Game Boy Light

A Game Boy Light (en xaponés: ゲームボーイライト) é unha videoconsola portátil de Nintendo que saíu á venda unicamente no Xapón en abril de 1998. Ao igual que a Game Boy Pocket, a consola tiña un prezo de 6.800 iens.^[1] É case do mesmo tamaño que a Pocket e ten unha luz de fondo parcialmente azulada para condicións de pouca luz. Utiliza dúas pilas AA, que lle dan aproximadamente 20 horas de autonomía coa luz apagada e 10 cando está acesa.^[2]

Game Boy Light
Instancia de modelo de produto
Parte de Liña Game Boy
Produción
Fabricante Nintendo
Cronoloxía
Precedido por Game Boy
Sucedido por Game Boy Color
[ Wikidata ] [ C:Commons ]

A Game Boy Light é a máis rara da saga Game Boy, podéndose comprar case unicamente por importación dende o Xapón durante 1998. Foi a única consola de Nintendo producida con pantalla alumada ata a saída da Game Boy Advance SP en 2003.

Especificacións técnicas

Tamaño	Aproximadamente 80 mm x 135 mm x 27 mm (An x Al x Pr)
Peso	Aproximadamente 138 g
Pantalla	Pantalla reflectante supertrenzada nemática (STN) de cristal líquido (LCD)
Tamaño de pantalla	50 mm por 45 mm
Fotogramas por segundo	59.727500569606 Hz
Enerxía	6 V, 0.7 W (2× pilas AA)
Duración das pilas	Aproximadamente 10 horas de xogo (coa luz acesa)[2] Aproximadamente 20 horas de xogo (coa luz apagada)[2]
CPU	Zilogic Z80 a 4.194304 MHz
Memoria	64 KB espazo de direccións incluíndo: 8 KB de RAM de traballo integrada Ata 16 páxinas de 8 KB de RAM de traballo intercambiábel (no cartucho de xogo) para un máximo de 128 KB de RAM externa (que pode ser alimentada por batería para gardar partidas). 8 KB de memoria RAM para a pantalla LCD. 32 KB de Game Pak externa ROM, dos cales 16 KB son intercambiábeis ROM de arrinque de 256 bytes no chip; cartuchos de 32 KB, 64 KB, 128 KB, 256 KB, 512 KB, 1 MB, 2 MB, 4 MB e 8 MB.
Resolución de pantalla	160 (ancho) × 144 (alto) píxeles (10:9 relación de aspecto)
Soporte de cor	2 bits (catro tons de "cinsentos": claro a moi escuro) Referencia:  0x0  0x1  0x2  0x3
Son	Procesador PSG de Estéreo FM de 4 canles
Entrada	Cruceta de oito direccións Catro botóns de acción (A, B, Start, Select) Potenciómetro de volume Potenciómetro de contraste Interruptor de acender I/O en serie ("Cable link"): 512 kbit/s con até 4 conexións en serie Cartucho I/O

Edicións especiais

Os primeiros dous modelos que saíron á venda foron as versións dourada e prateada. Un pouco máis tarde saíron seis edicións especiais e limitadas, que son:

• Game Boy Light Clear Red: Tezuka Osamu World Shop.^[3]
• Game Boy Light Astro Boy: Tezuka Osamu World Shop.^[4]
• Game Boy Light Pikachu Yellow: Pokémon Center Tokio. Como o seu propio nome indica, esta versión vendeuse só na única tenda Pokémon Center que había por aquel entón, en Tokyo.^[5]
• Game Boy Light Clear Yellow: Toy's 'R' Us.^[6]
• Game Boy Light Famitsu Skeleton. Existen dúas versións, aínda que a consola é exactamente a mesma nas dúas. Por unha banda está a edición de encarga e por outra a edición de evento. A primeira conseguíase comprándoa por correo e a segunda nun evento especial realizado no barrio xaponés de Akihabara.^[7]