Raias

Co nome común de raias coñécense os peixes cartilaxinosos que integran, segundo algúns autores, a superorde dos batoideos (Batoidea), da subclase dos elasmobranquios (Elasmobranchia), aínda que o termo raia designa máis especificamente ás especies da orde dos raiformes (Rajiformes).

Batoideos (Batoidea) Raias Rango fósil: triásico - actualidade [1]
Raia aguia (Aetobatus narinari)
Clasificación científica
Dominio: Eukaryota Reino: Animalia Superfilo: Deuterostomia Filo: Chordata Subfilo: Vertebrata Infrafilo: Gnathostomata Clase: Chondrichthyes Subclase: Elasmobranchii Superorde: Batoidea (non válido; nome válido: Rajiformes) [2]
Ordes
Véxase o texto

Os batoideos están moi emparentados cos selaquimorfos (Selachimorpha) ou tiburóns e, de feito, os batoideos novos son moi parecidos a estes.

Características

Posúen esqueleto cartilaxinoso e as aberturas branquiais na cara ventral do corpo, baixo as aletas pectorais (polo que se denominan hipotremos ou hipotremados); as devanditas aletas pectorais están moi ensanchadas e únense por diante cos lados da cabeza para formaren un ángulo anterior ou bico. Carecen de aleta anal. O corpo é basicamente aplanado.

Os ollos e os espiráculos están situados na cara dorsal; os ollos carecen de membrana nictitante. As mandíbulas poden proxectarse cara a adiante na maioría das especies.

Reprodución

Os ovos dos batoideos, a diferenza dos doutros peixes, son fecundados dentro do corpo da femia. Excepto os da familia dos Rajidae, incúbanse dentro da femia e as crías nacen vivas (ovovivíparos).

As femias da familia dos Rajidae poñen ovos fecundados. Estes son rectangulares, planos e brandos, con catro rabos nas esquinas para suxeitarse ás algas.

Hábitat

Son animais mariños, cunha distribución cosmopolita en augas tropicais e subtropicais, temperadas ou frías, moitas especies en augas costeiras e algunhas en augas profundas. Só algunhas especies, como as mantas, viven en mar aberto.

Algúns batoideos poden vivir en baías e estuarios lixeiramente salgados.

Cara inferior da cabeza dunha raia. Nótense as cinco aberturas branquiais.

Alimentación

A maior parte dos batoideos posúen unha dentadura pesada e roma para romper as cunchas dos moluscos e algúns peixes. As mantas aliméntanse de plancto.

Clasificación

• Superorde Batoidea ou Rajomorphii
  • Orde Rajiformes (raias verdadeiras)
  • Orde Pristiformes (peixes serra)
  • Orde Torpediniformes (estrugas)
  • Orde Myliobatiformes (raias látego)