ISEE 2

ISEE 2, acrónimo de International Sun-Earth Explorer 2, foi un satélite artificial colaboración da NASA e da ESA lanzado o 22 de outubro de 1977 mediante un foguete Delta 2914 desde Cabo Cañaveral.^[1][2][3]

ISEE 2 / International Sun-Earth Explorer 2
Tipo	Científico
Organización	NASA/ESA
Destino actual	Reentrado na atmosfera.[1][2][3]
Data de lanzamento	22 de outubro de 1977, 13:53 GMT[1][4][5][6]
Foguete portador	Delta 2914[1][3]
Sitio de lanzamento	Cabo Cañaveral, rampla 17B[1][2]
Obxectivo da misión	Estudo das partículas e campos magnéticos da magnetosfera terrestre e solar e a súa interacción.[1][2]
Decaemento	26 de setembro de 1987[4]
NSSDC ID	1977-102B
Masa	165,78 kg[1]
Potencia	112 W[1]
v c e

Características

ISEE 2 foi parte dunha flotilla de tres naves (xunto con ISEE 1 e ISEE 3) para estudar os campos e partículas da magnetosfera terrestre e solar e a súa interacción. As tres naves fixeron medicións en diferentes partes do espazo, das proximidades terrestre ao espazo interplanetario. A chamada parte nai/filla da misión consistía de ISEE 1 e 2 orbitando a Terra en proximidade a unha da outra para facer medicións simultáneas da variación dos campos e partículas interactuando entre o sistema Terra-Sol.^[1][2][3]

A nave estabilizábase mediante xiro a 19,8 r.p.m., co eixo de xiro case perpendicular ao plano da eclíptica. Tiña unha masa de 165,78 kg e forma Cilíndrica, co corpo cuberto de células solares que producían ata 112 W de potencia. Tanto ISEE 2 como ISEE 1 reentraron na atmosfera o 26 de setembro de 1987.^[1][2][3]