Rapante común

O rapante común^[1][2][3], tamén chamado rapante^[4][5] ou meiga^[6], ( Lepidorhombus whiffiagonis, Walbaum 1792) ) é unha especie de peixe teleósteo da orde dos pleuronectiformes, suborde dos pleuronectoideos e familia dos escoftálmidos,^[7]

Rapante común Lepidorhombus whiffiagonis
Clasificación científica
Reino: Animalia Filo: Chordata Subfilo: Vertebrata Clase: Actinopterygii Subclase: Neopterygii Infraclase: Teleostei Superorde: Acanthopterygii Orde: Pleuronectiformes Suborde: Pleuronectoidei Familia: Scophthalmidae Xénero: Lepidorhombus Especie: L. whiffiagonis
Nome binomial
Lepidorhombus whiffiagonis (Walbaum, 1792)

Taxonomía

A especie foi descrita en 1792 polo médico, naturalista e taxónomo alemán Johann Julius Walbaum, baixo o nome de Pleuronectes whiffiagonis,^[7] na súa edición da obra de Peter Artedi Petri Artedi sueci genera piscium in quibus systema totum ichthyologiae proponitur cum classibus, ordinibus, generum characteribus, specierum differentiis, observationibus plurimis: redactis speciebus 242 ad genera 52: Ichthyologiae pars 3. Ant. Ferdin. Röse: Grypeswaldiae.
(Ampliación da terceira parte da Ichthyologiae de Artedi, orixinalmente editada por C. Linnaeus.)

Sinónimos

Ao longo do tempo, ademais de polo nome orixinario citado, esta especie foi coñecida polos seguintes sinónimos:^[7]

• Lepidorhombus megastoma Donovan, 1804
• Pleuronectes megastoma Donovan, 1804
• Pleuronectes pseudopalus Pennant, 1812
• Rhombus (Lepidorhombus) whiffiagonis (Walbaum, 1792)

Descrición

Rapante de gran tamaño pescado en Irlanda.

As principais características morfolóxicas de Lepidorhombus whiffiagonis son:^[2]

• Corpo ovalado, alongado, delgado e translúcido, de até case 60 cm de lonxitude.
• Boca grande e oblicua, coa mandíbula inferior máis desenvolvida ca a superior; dentes pequenos, aguzados e curvados cara a atrás.
• Ollos de tamaño mediano.
• Escamas pequenas e caedizas.
• Liña lateral ben marcada, e curvada sobre a aleta pectoral
• Aleta pectoral do lado cego algo máis pequena que a do lado pigmentado. Aletas pelvianas bastante separadas da anal. Aleta caudal ampla e arredondada.
• Coloración castaña clara no lado pigmentado, ás veces con manchas arredondadas máis escuras (especialmente nos exemplares capturados no gran Sol), e branca no lado cego.

Distribución

Distribúese polo Atlántico nororiental, desde Islandia e o noroeste de Noruega até o sur do cabo Bojador (26° N), Sáhara Occidental e as illas Azores, e polo Mediterráneo, sendo máis abundante no sur de Noruega, costas occidentais das illas Británicas e Francia, e as da Península Ibérica, até o cabo da Roca.^[8][9]

Hábitat e bioloxía

Rapante fritido.

Hábitat

Vive sobre fondos areosos ou mixtos, de 50 a 500 m de profundidade, aínda que ás veces pódese encontrar nadando libremente. É raro velo preto da beiramar.^[2][8]

Bioloxía

Nutrición

Aliméntase de pequenos peixes bentónicos, moluscos e crustáceos.^[2][8]

Reprodución

Desova en augas profundas de Islandia e o oeste das illas Británicas, desde marzo a xuño. Os ovos, de 1 mm de diámetro, elosionan ao cabo dunha semana. As larvas son peláxicas, e os novos van descendendo cara ao fondo cando acadan os 20 mm de lonxitude.^[8]

En Galicia

A primeira cita desta especie en Galicia débese a De Buen, no seu traballo de 1935 "Fauna ictiológica. Catálogo de los peces ibéricos de la planicie continental, aguas dulces, pelágicos y de los abismos próximos. II parte!, Not. y Res. Inst. Esp. Ocean. 82: 1-89.^[2]