Groselleira negra

A groselleira negra (Ribes nigrum), é un arbusto frondoso do xénero Ribes, non espiñento, de 1,50 m de alto, que bota un olor diferenciado e desagradábel, e cuxo froito, a grosella negra, é unha baga agre mais comestíbel. Non é común o cultivo en Galiza.

Groselleira negra
Clasificación científica
Reino: Plantae División: Magnoliophyta Clase: Magnoliopsida Orde: Saxifragales Familia: Grossulariaceae Xénero: Ribes Especie: R. nigrum
Nome binomial
'Ribes nigrum' L.

Groselleira negra crúa

Valor nutricional por 100 g
Enerxía	264 kJ (63 kcal)
Carbohidratos	15.4 g
Graxas	0.4 g
Proteínas	1.4 g
Vitaminas	Cantidade %DV†
Tiamina (B1)	4% 0.05 mg
Riboflavina (B2)	4% 0.05 mg
Niacina (B3)	2% 0.3 mg
Ácido pantoteico (B5)	8% 0.398 mg
Vitamina B6	5% 0.066 mg
Vitamina C	218% 181 mg
Vitamina E	7% 1 mg
Minerais	Cantidade %DV†
Calcio	6% 55 mg
Ferro	12% 1.54 mg
Magnesio	7% 24 mg
Manganeso	12% 0.256 mg
Fósforo	8% 59 mg
Potasio	7% 322 mg
Sodio	0% 2 mg
Cinc	3% 0.27 mg
Outros constituíntes	Cantidade
Auga	82 g
Ligazón á base de datos USDA
Units μg = microgramos • mg = miligramos IU = Unidades internacionais
†As porcentaxes son aproximadas empregando a recomendación de US para os adultos. Fonte: Base de datos USDA Nutrient

Descrición

Orixinario de Europa oriental e central, pertence ao mesmo xénero cás demais groselleiras. Ten follas lobuladas, dentadas, cuxo envés é pálido con glándulas secretoras amarelas. As flores da groselleira negra son arrubiadas no interior e verdosas por fóra, formando un cáliz piloso, de maior tamaño cá corola.

O seu froito é a grosella negra, unha baga que nace en acios de grans negros, polposos, con pela lisa e recendentes, envoltos polos cálices das flores de onde saen. O zume de grosella negra é escuro, acidulado e aromático. Moi apreciado en Francia pola súa utilización en repostaría, como bebida alcólica e en perfumaría.

Groselleira negra

Produción

A maior produción dáse en Polonia. A grosella negra descoñecíase na cultura clásica grecorromana e na Idade Media, e foi introducida en Francia a partir da Idade Moderna. No século XIX, pasou a ser apreciada polas súas propiedades curativas e tamén como aromatizador de viños e destilados. En Galiza aínda é bastante descoñecida, agás na xardinaxe ou na alta cociña.

Utilidades

Medicina

A grosella é unha baga rica en vitamina C.

Cientificamente, demostrouse que o óleo da semente de groselleira negra ten un moderado efecto inmunolóxico atribuíbel á súa capacidade para reducir a produción de prostaglandina E2.^[1] Outros estudos atribúenlle á baga da groselleira negra propiedades antioxidantes e antimicrobianas^[2][3]

Ademais, a groselleira negra ten unha gran cantidade de vitamina C, polo que tradicionalmente se usou para previr doenzas como o escorbuto.

Repostaría

O seu sabor agre e moi acedo evita que se consuma crúa. Porén, utilízase como ingrediente de tortas, sorbetes, xelatinas e confeituras. En cociña, úsase como fondo de pratos e puré.^[4] En Francia faise un licor chamado crème de cassis.

Taxonomía

Ribes nigrum foi descrita por Carl von Linné e publicado en Species Plantarum 1: 201. 1753.^[5]

Sinonimia

• Botrycarpum nigrum (L.) A. Rich.
• Botrycarpum obtusilobum Opiz
• Grossularia nigra (L.) Rupr.
• Ribes cyathiforme Pojark.
• Ribes nigrum var. europaeum Jancz.
• Ribes nigrum var. pauciflorum (Turcz. ex Ledeb.) Jancz.
• Ribes olidum Moench
• Ribes pauciflorum Turcz. ex Ledeb.
• Ribesium nigrum (L.) Medik.^[6]