Salpornis

Salpornis é un xénero de aves paseriformes, un dos dous que conforman a familia dos cértidos, que comprende aos subidores máis típicos.

Salpornis
Salpornis spilonotus
Estado de conservación
Pouco preocupante
Clasificación científica
Reino: Animalia Filo: Chordata Subfilo: Vertebrata Clase: Aves Orde: Passeriformes Infraorde: Passerida Superfamilia: Certhioidea Familia: Certhiidae Xénero: Salpornis G. R. Gray, 1847
Especies
Véxase o texto

Características

De pequeno tamaño e aspecto típico dos subidores, a súa cola ten doce plumas, arredondadas nos extremos. A fosa nasal está libre, desprovista de serdas. A lingua termina en cinco serdas.^[1]

Taxonomía

Descrición

O xénero foi descrito en 1847 polo zoólogo inglés George Robert Gray.

Etimoloxía

O nome Salpornis está formado pos elementos do latín científico salp-, tirado, segundo algún s etimoloxístas, do termo do grego antigo σαλιγκτής salpinktḗs "o trompeta", e -ornis, derivado do grego antigo ὄρνις órnis, "paxaro".^[2]

Clasificación

No xénero recoñécense na actualidade dúas especies, unha que vive na India e outra de distribución africana, esta última considerada anteriormente como unha subespecie. Pero as diferenzas en tamaño, chíos e as secuencias do ADN mitocondrial apoiaron a división das poboacións africanas e indias, para formar a nova especie Salpornis salvadori.^[3][4]

Daquela, no xénero recoñécense dúas especies, unha delas con dúas subespecies (ou tres, segundo os autores).

• Xénero Salpornis G. R. Gray, 1847 ^[5][6]
  • Salpornis salvadori (Bocage, 1878)
  • Salpornis spilonotus (Franklin, 1831) (Ás veces denominada Salpornis spinolota)
    • Salpornis spilonotus rajputanae Meinertzhagen & A. Meinertzhagen, 1926 ^[7]
    • Salpornis spilonotus salvadori (Bocage, 1878) ^[8]
    • Salpornis spilonotus spilonotus (Franklin, 1831) ^[9]

Cabezas e pés de Tichodroma e Salpornis.

Controversia taxonómica

Salpornis é un xénero que na actualidade se inclúe na familia dos Certhiidae. Pero no pasado fora incluído na familia dos Sittidae ou colocado nunha familia propia, a dos Salpornithidae.

As análise filoxenéticas moleculares mostran que definitivamente está dentro da superfamilia dos Certhioidea, pero subsiste certa incerteza acerca da súa situación en relación cos xéneros Sitta, Tichodroma e Certhia.

Aínda que son de aparencia similar aos subidores do xénero Certhia, porén, non utilizan as súas colas para apoialas nos troncos das árbores nas súas escaladas, e algunhas evidencias moleculares demostran que está máis cerca das agatuñadeiras do xénero Sitta,^[10] mentres que outro estudo suxire unha relación máis estreita con Tichodroma muraria.^[3]