Skylab

Skylab foi unha estación espacial da NASA lanzada o 14 de maio de 1973 mediante un foguete Saturno V desde o Centro Espacial de Cabo Cañaveral.^[2][3][5]

Skylab
Tipo	Estación espacial
Organización	NASA
Data de lanzamento	14 de maio de 1973, 17:30 GMT[1][2][3][4]
Foguete portador	Saturno V[2][5]
Sitio de lanzamento	Centro Espacial de Cabo Cañaveral, rampla 39A[2][6]
Obxectivo da misión	Estación espacial tripulada[2][6]
Decaemento	11 de xullo de 1979[1]
NSSDC ID	1973-027A
Masa	90.607 kg[2][5][6]
Dimensións	36,12 m de longo, 21,0 m de envergadura[6]
Potencia	11 kW[6]
v c e

Historia

Skylab foi a resultante de equipo sobrante do programa Apolo tras os recortes que eliminaron as últimas misións luares programadas. Como consecuencia quedaron dispoñibles varios Saturno V e outro material que foi adaptado para o lanzamento da que sería a primeira estación espacial dos Estados Unidos.^[2][3][5]

Características

Skylab estaba composta de cinco partes: a montura para o telescopio Apolo (ATM), o adaptador para acoplamentos múltiples (MDA), o módulo de esclusa de aire (AM), a unidade instrumental (IU) e o taller orbital (OWS). A estación tiña forma de cilindro cunha lonxitude total de 36,12 m, unha envergadura de 21,0 m e un volume interno de 361 m³, co telescopio formando un ángulo de 90 graos respecto do resto da estación despois de ser lanzada. O telescopio estaba destinado á observación solar e usaba película fotográfica para rexistrar as imaxes que debía ser recuperada polos astronautas mediante unha saída extravehicular. A estación estaba deseñada para ser visitada por naves Apolo, que se acoplaban ao módulo de acoplamento múltiple, permitindo o acceso dos astronautas ao interior. A unidade instrumental foi usada unicamente durante o lanzamento para proporcionar capacidade de guiado e navegación ata a chegada a órbita e posterior despregue do telescopio e os paneis solares. O taller orbital estaba formado por un cilindro que era en realidade unha etapa Saturno 4B modificada para ser habitable por tres astronautas durante longos períodos de tempo e era capaz de producir ata 11 kW de potencia. Contiña provisións e as estancias dos astronautas, permitindo permanecer ata 84 días de maneira continua na estación.^[2][3][4][5]

Despois da terceira e última visita tripulada á estación os enxeñeiros de terra fixeron probas coa estación en remoto para comprender determinados fallos e gañar experiencia en sistemas de longa duración no espazo.^[2][3][4][5]

A estación foi deixada nunha órbita que se pensou suficientemente estable e segura como para poder ser visitada nos primeiros voos do incipiente programa do transbordador espacial, pero a combinación dunha taxa de diminución da órbita maior do esperada e o atraso nos primeiros voos do transbordador causaron que a estación reentrara na atmosfera o 11 de xullo de 1979. Anacos resultantes da desintegración acabaron dispersos sobre Australia.^[1]

Lanzamento

Aos 63 segundos do lanzamento un dos escudos antimeteoritos e o panel solar número 2 foron arrincados debido ás forzas aerodinámicas. Os restos ademais atascaron o panel solar número 1. A estación foi inserida de maneira normal nunha órbita de 435 km de altura, pero debido á falta do escudo antimeteoritos a temperatura no interior da estación comezou a subir perigosamente, chegando a 52 °C. O panel solar número 1 non conseguiu despregarse pero afortunadamente si se despregou o panel que ía montado no telescopio Apolo. A primeira misión tripulada á estación atrasou o seu lanzamento dez días, durante os cales practicaron técnicas para reparar os estragos unha vez a bordo, conseguindo restablecer unhas mínimas condicións de habitabilidade e traballo e permitindo que as dúas expedicións posteriores puidesen facer o seu traballo con normalidade.^[2][3][4][5]

Instrumentos

Skylab levaba a bordo instrumentos para realizar diversos experimentos científicos:^[2][3][4][5]

• Un coronógrafo para observacións solares.
• Un espectroheliómetro para o ultravioleta.
• Experimentos sobre fabricación no espazo.
• Varios instrumentos para observación terrestre, entre els:
  • Unha cámara multiespectral.
  • Unha cámara para o estudo do terreo.
  • Un espectrómetro infravermello.
  • Un explorador multiespectral.
  • Un radiómetro/dispersómetro de microondas.
  • Un altímetro.
  • Un radiómetro microondas en banda L.

Misións

A estación foi visitada por tres tripulacións, cada unha composta por tres astronautas, en tres misións distintas:^[2][3][4][5]

• Skylab 2: do 25 de maio ao 22 de xuño de 1973.
• Skylab 3: do 28 de xullo ao 25 de setembro de 1973.
• Skylab 4: do 16 de novembro de 1973 ao 8 de febreiro de 1974.

Véxase tamén

Wikimedia Commons ten máis contidos multimedia na categoría:  Skylab

Outros artigos

• Saturno V
• Saturno IVB
• Nave Apolo