Xosé Antonio Touriñán

Xosé Antonio Touriñán Rodríguez, nado o 16 de marzo de 1980, en Castelo, Culleredo, é un actor, humorista e presentador de televisión galego.

Xosé Antonio Touriñán

Biografía
Nacemento	16 de marzo de 1980 (45 anos) Castelo, España
Actividade
Ocupación	actor, presentador
Membro de	Mucha e Nucha
Sitio web	tourinhan.gal

Traxectoria

Formouse no teatro escolar en Tarrío e no Instituto Crucero Baleares de Culleredo, e licenciouse en Filoloxía Galego-Portuguesa. A principios do 2000 creou con Marcos Pereiro o dúo cómico Os 2 de Sempre. Interpretando as personaxes de Mucha e Nucha, realizaron as súas primeiras aparicións televisivas nas últimas edicións do Supermartes, da Televisión de Galicia, e máis tarde acadaron sona cos mesmos roles no programa Luar.^[1] En 2006 realizou a súa primeira incursión no cine, cun pequeno papel no filme Días azuis, de Miguel Santesmases.^[1] Durante os seguintes anos aparceu ademais noutros programas da TVG como Air Galicia ou a serie de éxito Padre Casares.

No ano 2007 abriu en Carral xunto a Marcos Pereiro o local de espectáculos e concertos Sala The Star, que se mantivo activo até 2012. No 2009 fundou, tamén con Marcos Pereiro como socio, a súa propia produtora, Airapro Producións, unha pequena empresa con sede en Carral e Betanzos, que traballa no sector audiovisual e da representación artística, xestionando grupos musicais e humoristas como Heredeiros da Crus, Pepo Suevos e as propias "Cantareiras de Ardebullo". 

En 2009 presentou o programa sobre sendeirismo Botarse ao monte, polo que recibiu o seu primeiro nomeamento aos premios Mestre Mateo, premios que el mesmo presentou por primeira vez en 2010.

Entre 2011 e 2015 apareceu en Era visto!, interpretando ao taberneiro Puskas. Traballou habitualmente en Land Rober, e en 2012, despois de que o seu presentador, Roberto Vilar marchase a Mediaset, e o programa fose cancelado, Touriñán pasou a presentar un novo espazo no mesmo horario e co mesmo equipo: Tourilandia.^[2][3] En 2014 chegoulle o seu primeiro papel de importancia no cine, no filme de Alfonso Zarauza Os fenómenos.^[1]

En 2018 traballou na serie de Antena 3 Fariña, baseada no libro homónimo de Nacho Carretero, e onde interpretou a un dos fillos do traficante Manuel Charlín. Dende 2021 presenta xunto con Marta Hazas para TVE o programa de viaxes Rutas bizarras, emitido en La 2.^[4] A continuación protagonizou o filme Cuñados e tivo un papel en Malencolía.

Vida persoal

Xunto á súa parella, Patricia, é pai de dous fillos: Antía e Andrés.^[5]

Filmografía como actor

Xosé Antonio Touriñán no espectáculo de Mucha e Nucha, as Cantareiras de Ardebullo, nas festas do Carme de Marín

• Supermartes (2005), programa de televisión.
• Marta (2006), curtametraxe de Juan de Oliveira Rubinos.
• Días azuis (2006), longametraxe de Miguel Santesmanes, interpretando a Pincha La Palma.
• En pé de festa (2006), programa de televisión, interpretando a Mucha e outras personaxes.
• Efectos secundarios (2007), serie de televisión, interpretando a Emilio.
• Luar (2008–2011, 2013), programa de televisión, interpretando a Mucha e outras personaxes.
• Air Galicia (2009), programa de televisión, interpretando a varias personaxes.
• Padre Casares (2008– ), serie de televisión, interpretando a Rodolfo.
• Land Rober (2009–2011), programa de televisión, interpretando a Ricardo e outras personaxes.
• Era visto! (2011–2014), serie de televisión, interpretando ao taberneiro Puskas.
• Un soño de Nadal (2011), programa especial televisión, interpretando a Mucha e outras personaxes.
• A Casa da Conexa (2012–2014), programa de televisión, interpretando a Mucha e outras personaxes.
• Un conto de Nadal por Mucha e Nucha (2013), programa especial televisión, interpretando a Mucha e outras personaxes.
• Os fenómenos (2014), longametraxe de Alfonso Zarauza, interpretando a Curtis.
• Land Róber Tunai Show (2015– ) programa de televisión cómico, copresentador e actor interpretando varios personaxes.
• Buscando Ardebullo (2016).
• Vidago Palace (2017), serie de televisión, interpretando ao Padre Raimundo.
• Fariña (2018), serie de televisión de Antena 3, interpretando a Paquito Charlín.
• Justo antes de Cristo (2018), serie de televisión de Movistar+, interpretando o escravo Agorastocles.
• Somos criminais (2018), con Carlos Blanco.
• Pequeñas coincidencias (2018-2020), serie de televisión de Amazon, interpretando a Rafa.
• Unha noite na praia (2019), peza de teatro escrita e dirixida por Javier Veiga.
• A desorde que deixas (2020), serie de televisión de Netflix, interpretando a Acevedo.
• Cuñados (2021), longametraxe de Toño López, interpretando a Sabonis.
• El club del paro (2021), longametraxe de David Marqués.
• +Cuñados (2024), longametraxe de Luis Avilés.

Como presentador de televisión

• Perdelo todo (2006), programa de televisión.
• Botarse ao monte (2009), programa de televisión.
• Gala dos Premios Mestre Mateo 2009, programa especial de televisión. Presentador e guionista.
• Gala dos Premios Mestre Mateo 2010, programa especial de televisión. Presentador e guionista.
• Tourilandia (codirector xunto con Xosé Arias, 2012-2013).^[6]
• Rutas bizarras (2021, con Marta Hazas).

Galardóns e nomeamentos

Premios Mestre Mateo

Ano	Categoría	Título	Resultado
2009	Mellor comunicador	Botarse ao monte	Nomeado
2011	Mellor comunicador	Un soño de Nadal	Nomeado
2012	Mellor comunicador	Tourilandia	Nomeado
2013	Mellor comunicador	A casa da conexa	Nomeado
2014	Mellor actor secundario	Os fenómenos	Nomeado
	Mellor comunicador	A casa da conexa	Nomeado
2018	Mellor actor	Land Róber Tunai Show	Nomeado
2021	Mellor actor	Cuñados	Nomeado