Abidjan

Abidjan esas l'ex-chef-urbo e maxim populoza urbo di Ivora Rivo. Segun la demografiala kontado di 2021, ol havis 6 231 017 habitanti, o cirkume 20% de la habitantaro di la lando. Ol ank esas la 6ma maxim populoza urbo de Afrika, dop Lagos, Kairo, Kinshasa, Dar-es-Salaam e Johannesburg. Lua tota surfaco esas 2.119 km².

Abidjan

Kelk imaji pri Abidjan.
Lando:	Ivora Rivo
Informo:
Latitudo:	5°20'00" N^[1]
Longitudo:	4°02'00" W^[1]
Altitudo:	17 m
Surfaco:	2 119 km²
Habitanti:	6 231 017 (2021)
Denseso di habitantaro:	3000 hab./km²
Disto de Yamoussoukro:	235,8^[2] km
Horala zono:	UTC+0
Urbestro:	Beugré Robert Mambe
Mapo:

Oficala retosituo:
www.districtabidjan.ci

Ol esis chef-urbo di Ivora Rivo de 1934 til 1983, kande la sideyo di guverno chanjesis a Yamoussoukro. Tamen, la maxim multa ambasadeyi restas en Abdijan.

Komence, Abdijan esis mikra vilajo habitita da peskisti del etnio Atchan. En 1896, pos serio di mortigiva epidemii di flava febro, Franca koloniigisti decidis transferar su a plu sekura loko. En 1899, kolonial administrado transferesis de Grand-Bassam a la nuna Abdijan. En 1903, Abidjan divenis urbeto.

La lokizo di Abdijan, an la bordo di lagoon n'doupé ("laguno di varm aqui") ofris plusa lando e facilesi por expanso di komerco. La kayo di Petit Bassan (nun quartero Port-Bouët) rapide divenis plu importanta kam la kayo di Grand-Bassam. Abidjan divenis la precipua nabo ekonomiala di la kolonio, e la komerco kun regioni doplanda facesis da Libanana komercisti. En 1910, inauguresis ferovoyo liganta ol ad urbo Dimbokro.

En 1931, quartero Treichville ligesis a quartero Plateau per flotacanta ponto, proxim ube nun jacas ponto Félix-Houphouët-Boigny. En 1931, stradi komencis recevar adresi, procedo qua finis tempale en 1964. En 1934, Abidjan divenis la chef-urbo di Ivora Rivo per dekreto. Dum la yari 1940a, konstruktesis hotelo Bardon Park. En 1950, kompleteskis kanalo qua ligis la laguno al oceano. En 1958, inauguresis l'unesma ponto liganta insulo Petit Bassam (Port-Bouët) a la kontinento.

Kande Ivora Rivo nedependanteskis en 1960, Abidjan divenis la centro administrala ed ekonomiala di la nova lando. Europani e la mez-klaso komencis instalar su sude de Treichville, vers l'aeroportuo e la plaji. La habitantaro kreskis rapide, de 180 mil personi en 1960 til 1 269 000 en 1978. Nova desnaiva distrikti, exemple Cocody, aparis dum ta epoko. Konstruktita segun koloniala stilo, Cocody divenis hemo por richa Ivorani, e por diplomacisti. La katedralo di Santa Paulus komencis konstruktesar en 1980, pos vizito da papo Ioannes Paulus la 2ma, ed inauguresis en 1985. En 1983, Yamoussoukro divenis chef-urbo di la lando dum la prezidanteso di Félix Houphouët-Boigny, qua naskis ibe.

De 2002 til 2007 e de 2010 til 2011, l'urbo subisis l'efekti dil unesma e di la duesma interna militi di Ivora Rivo. En 2004 eventis konflikto intr Franc armeo ed Ivorana trupi loyala a lora prezidanto Laurent Gbagbo, pos ke aer-armeo Ivorana atakis paco-trupi Franca norde de la lando. Grupi favorebla a Gbagbo organizis tumulti e spoliado en la urbo, ed atakis domi, skoli ed entraprezi Franca, pos ke Franci destruktis l'aer-armeo Ivorana. Franca trupi okupis l'urbo por cesar la tumulti.

Historio

Geografio

Fratala urbi

Referi

Wikiwand - on