Liverpool

Liverpool esas urbo an la nord-westo di Anglia. Segun statistiki por yaro 2022 ol havis 496 770 habitanti. Lua tota surfaco esas 134 km². La regiono dil urbo (Liverpool City Region) havis 1 571 045 habitanti ye la sam yaro, ed okupas 903 km², havanta sua propra administral autoritato.

Liverpool
Kelk imaji pri Liverpool.
Blazono
Lando:	Unionita Rejio
Naciono konstitucanta:	Anglia
Informo:
Latitudo:	53°24′26″N
Longitudo:	2°59′30″W
Altitudo:	26[1] m
Surfaco:	134 km²
Habitanti:	496 770 (2022)
Denseso di habitantaro:	4442 hab./km²
Disto de London:	337,4[2] km
Horala zono:	UTC+0 (UTC+1 dum somero)
Urbestro:	Richard Kemp
Mapo:
Oficala retosituo:
http://liverpool.gov.uk/

Noktal imajo pri la centro di Liverpool.

Liverpool jacas che l'estuario di fluvio Mersey an lua estala rivo, sud-weste de komtio Lancashire. Ol divenis burgo en 1207, ed urbo en 1880. Ol kreskis kom portuala urbo samatempe kam developesis l'Industriala Revoluciono.

L'ekonomio di Liverpool esas diversa, enkorpiganta turismo, kulturo, marala transporto, hoteli e restorerii, hospitali, ciencal agadi, moderna manufakturi, kreiva agadi, e dijital industrio. L'urbo havas la 2ma maxim granda quanto di artala galerii e nacionala muzei, historiala edifici e parki dil Unionita Rejio, dop London. La populareso dil grupo The Beatles kontributis por developar lua turistala stando. Liverpool esis la 5ma maxim vizitita urbo dil Unionita Rejio en 2022.

L'urbo havas 4 publika Universitati. L'University of Liverpool fondesis en 1881 e havas plua kam 30 mil studenti. L'universitato Liverpool John Moores establisesis en 1823 kom "Mekanikala Skolo pri Arto di Liverpool", e pose fuzesis kun la Politeknikala Skolo di Liverpool. L'universitato Liverpool Hope establisesis en 1844 kun nomo Saint Katharine's College. Fine, l'universitato Edge Hill establisesis en 1885 por formacar docisti, e divenis universitato en 2006.

Historio

Petra cirklo trovita che parko Calderstones.

Dum fer-epoko, la regiono ube nun jacas Liverpool havis poka habitanti, malgre existir marala portuo en Meols. Existas evidentaji pri prehistoriala farmeyi en Irby, Halewood e Lathom, e neolitika petra cirklo trovesis en Calderstones.

Romani arivis en la regiono cirkume yaro 70, e konstruktis fortifikuro en Chester. Segun Claudius Ptolemaeus, Romani nomizis l'estuario di Mersey Seteia Aestuarium, nomo qua originis de lokala tribuo, Setantii. Pos ke Romani abandonis la regiono, ol duris habitesar da Britoni, lokala kelta tribuo. Dum la 10ma yarcento, Vikingi establisis mikra stato en la regiono.

Patento-letro dal rejulo John di Anglia anuncis la kreo dil burgo di Liverpool en 1207. Cirkume la duimo dil 16ma yarcento lua habitantaro esis nur 500 personi.

Liverpool en 1680.

Dum la 17ma yarcento eventis kombati kun skopo di kontrolar la urbo dum l'interna milito di Anglia, inkluzinte 8-dia siejo en 1844. Akto dil Parlamento di Anglia transformis la burgo en komono en 1699, la sama yaro en ke la navo por transportar sklavi Liverpool Merchant sendesis ad Afrika.

De l'epoko Romana, la vicina urbo Chester, apud la fluvio Dee, esabis la precipua portuo Angla che Maro di Irlando. Tamen, la sedimenti transportita dal Dee gradope komencis slamizar la portuo di Chester, e Liverpool divenis plu bona portuo. La habitantaro komencis kreskar rapide, samatempe kam la komerco kun Westal Indii augmentis. L'unesma doko por reparar navi konstruktesis en 1715.

Speke Hall, un ek la maxim anciena domi dil urbo.

Castle Street, kun urbo-domo centre de la imajo.