Lindá

Lindá er bergvatnsá, sem hefur upptök sín í lindum eða uppsprettum þar sem grunnvatn sprettur úr jörðu. Hiti og vatnsmagn lindáa eru tiltölulega jöfn allt árið og við upptökin leggur þær ekki að vetri, jafnvel ekki í mestu frostum. Lindár eru tærar og flóð og vatnavextir verða sjaldan í þeim. Bakkar þeirra eru vel grónir niður að vatnsborði og gróðurríkir hólmar með blómskrúði setja oft svip sinn á þær. Stærstu lindár Íslands tengjast hraunum og sprungusvæðum, þess vegna er meira um lindár í og við gosbelti landsins en annars staðar.

Laxá í Aðaldal er lindá

Elliðaárnar í Reykjavík eru lindár

Stærsta lindá á Íslandi er Sogið, sem rennur úr Þingvallavatni og myndar Ölfusá þar sem það rennur í Hvítá. Aðrar stórar lindár eru til dæmis Laxá í Aðaldal, Brúará og Ytri-Rangá.

Tengt efni

• Dragá
• Jökulá

Heimild

• Guðmundur Kjartansson 1945. Íslenskar vatnsfallategundir. Náttúrufræðingurinn 15, 113-126.