Џуџеста спирална галаксија

Џуџеста спирална галаксија — џуџеста верзија на спирална галаксија. Џуџестите галаксии се карактеризирани со тоа што поседуваат мали сјајности, мали пречници (помали од 5 кпс), ниска површинска сјајност, и ниско ниво на водородни маси.^[1] Овие галаксии може да се сметаат како подкласа на површинко слабосјајните галаксии.

NGC 5474 џуџеста спирална галаксија

Џуџестите спирални галаксии, особено нивните џуџести сродници видовите Sa-Sc спирални галаксии, се мошне ретки. За споредба, џуџестите елиптични галаксии, џуџестите неправилни галаксии, и џуџестите верзии на Магелановите спирални галаксии (кои може да се сметаат за преодни галаксии меѓу спиралните и неправилните во однос на морфологијата) се доста чести.^[1]

Се претпоставува^[2] дека џуџестите спирални галаксии може да се преобразат во џуџести елиптични галаксии, особено во густите јата.

Примери

• NGC 5474
• NGC 247
• NGC 6503
• NGC 3928
• NGC 625
• NGC 1051
• NGC 1311
• NGC 2188
• IC 4710

Местоположба

Повеќето забележани џуџести спирални галаксии се сместени надвор од јатата. Силните гравитациски заемодејства меѓу галаксиите и заемодејствата меѓу галаксиите и меѓујатниот гас се очекува дека ќе ги уништат дисковите на повеќето џуџести спирални галаксии.^[1][3] Сепак, џуџестите галаксии со спирална структура се забележани во јатото Девица и во јатото Коса.^[3][4][5][6]