Бачилско Езеро

Бачилско Езеро — се наоѓа во изворишниот дел на река Рибница, од левата долинска страна, на надморска височина од 1.760  метри.^[1] До езерото се  доаѓа  по  коњска  патека  која  води  од  село Тануше по долината на Рибница. Површината на езерото изнесува 318  м², а неговата длабочина се проценува на околу 2 метри^[1].

Бачилско Езеро (Езеро Бачилски Камен)
Површина	318 м2
Длабочина	2 м
Надморска висина	1.760 м
Планина	Кораб

Местоположба

Езерото се наоѓа во широка вдлабнатина - цирк, источно од врвот Бачилски Камен на источната падина во јужниот дел на планината Кораб, недалеку од главниот срт на протегање на корапската верига. Поточно, езерото е сместено во вдлабнатина под седлото (помеѓу) кое ги поврзува врвовите Бачилски Камен и Бабин Камен. Во научната литература и истражувања ова природно ледничко езеро е познато и под името Езеро Бачилски Камен^[1], поради неговата местоположба, односно бидејќи се наоѓа веднаш под истоимениот планински врв.

Одлики

Бачилското Езеро е постојано природно ледничко езеро кое зафаќа површина од 318 м². Во катастарот на недвижности, постои посебна парцела именувана како природно езеро Бачилски Камен чија површина изнесува 913 м² што може да се однесува на поввршината целото корито (басен), додека водната површина, односно онаа која е постојано под вода, е променлива и варира во однос на периодот и временските услови од топењето на снеговите на пролет (април-мај), сушниот и врнежливите периоди во лето и есен, додека зиме замрзнува. Езерото има крушовиден облик, односно заоблен облик со издолженост кон исток на крајниот североисточен брег. На западниот и северозападниот брег има неколку изворчиња од кои дотекува вода, додека самото езеро нема истека. На источниот брег на езерото постои листопадно дрво, како и брег (док) соѕидан од натрупани камења, кој најверојатно се користи од овчарите за втерување овци на капење. Забележително е големото повлекување на нивото на водата во топлиот период, крај на мај и почеток на јуни, кога нивото на водата се повлекува и за 1 метар во период од само 2 недели^[2].

Галерија

• 
  Поглед на езерото од падината на врвот Бачилски Камен
• 
  Поглед на езерото од исток
• 
  Поглед на езерото од исток
• 
  Поглед на езерото од север
• 
  Водите на Бачилското Езеро
• 
  Поглед на езерото со врвот Бачилски Камен во позадината
• 
  Поглед на езерото со врвот Бачилски Камен во позадината
• 
  Поглед на Бачилското Езеро
• 
  Поглед на езерото со врвот Бачилски Камен во позадината
• 
  Поглед на езерото со врвот Бачилски Камен во позадината
• 
  Поглед на езерото од север
• 
  Поглед на езерото од исток