Долгонога шлука

Долгоногата шлука, (науч. Himantopus himantopus) е широко распространета крајбрежна птица со многу долги нозе. Повеќето извори денес сугерираат дека постојат 2-4 вида.^{[2][3][4][5][6][7]} Оваа птица ја има и во Македонија.

	Повици на долгоногата шлука Снимено во Кина
Проблеми со пуштањето? Помош.

Долгонога шлука
Заштитен статус
Незагрозен  (МСЗП 3.1)[1]
Научна класификација
Царство:	Животни
Колено:	Хордови
Класа:	Птици
Ред:	Бекасови
Семејство:	Recurvirostridae
Род:	Himantopus
Вид:	Долгонога шлука (disputed)
Научен назив
Himantopus himantopus (Linnaeus, 1758)
Подвидови
1–7, види во текстот

Опис

Возрасните долгоноги шлуки се долги 33-36 см. Имаат долги розови нозе, долг тенок црн клун и се црнкави одозгора и бели одоздола, со бел врат и глава. Мажјаците имаат црн грб, често со зеленикав сјај. Кај женките, пак, грбот има кафевкава нијанса која е во контраст со црните пердуви на крилјата. Младенчињата имаат сиво наместо црно и песочна нијанса на крилјата.

Таксономија и систематизација

Таксономијата на оваа птица е сè уште проблематична. Некои издвојуваат најмногу 5 вида, а други, пак, сите ги сметаат за подвидови. Најприфатена таксономија е следната:

• Himantopus himantopus himantopus или H. himantopus) (Linnaeus, 1758) – вклучувајќи ги и предложените подвидови meridionalis (јужна Африка) и ceylonensis (Шри Ланка)

распространет е во западна Европа и Средоземјето до Средна Азија и потсахарна Африка, како и Мадагаскар, јужна и југоисточна Азија^[8][9][10]. Северозападните популации се селат на југ во зима.

Главата и вратот варираат од целосно бели до бели со црна капа и црно на задниот дел од вратот, вообичаено со бела линија низ горниот дел на грбот.

• Himantopus himantopus mexicanus, Himantopus mexicanus mexicanus или H. mexicanus (P.L.S.Müller, 1776)

Јужниот дел на Северна Америка преку Средна Америка и Карибите до северен Перу и североисточен Бразил.

Главата и вратот се секогаш бели, со црна капа која досега до линијата на окото, бела точка под окото и црна линија на задниот дел од вратот. Обично нема бела линија на горниот дел од грбот.

• Himantopus himantopus melanurus, Himantopus mexicanus melanurus или H. melanurus (Vieillot, 1817)

Јужна Америка од централен Перу и северен Чиле до југоисточен Бразил и Аргентина.

Главата и вратот обично се бели со црна линија на задниот дел од вратот и црна линија од тилот до окото. Обично има отворена црна линија на градите и бела низ горниот дел од грбот.

Возрасен Himantopus himantopus leucocephalus

Јајце од Himantopus himantopus

• Himantopus himantopus leucocephalus или H. leucocephalus (Gould, 1837)

Јава до Нова Гвинеја, Австралија и Нов Зеланд.

Главата е обично целосно бела, вратот бел со црно одзади и со отворена црна лента на градите. Обично има бела дамка на горниот дел од грбот.

• Himantopus himantopus knudseni, Himantopus mexicanus knudseni или H. knudseni (Stejneger, 1887)

Хаваи, каде е единствена крајбрежна птица.

Во основа слична со H. mexicanus, но црното на главата и вратот е пораширено, обично до под окото.

Поведение

Живеалиштето за размножување на долгоногата шлука се мочуриштата, плитките езера и вештачки езерца. Некои популации се птици преселници и се селат на океанските крајбрежја зиме, a оние од потоплите краишта се постојани жители и само посетители на некои региони.

Се хранат собирајќи ја храната од песокот или од плитката вода. Претежно јадат инсекти и ракчиња.

Се гнездат на оголено место на земја, во близина на водата, обично во помали групи.

Долгоногата шлука е еден од видовите на кои се однесува Договорот за заштита на африканско-евроазиските водни птици-преселници.

Галерија

• 
  Младенче
• 
  Младенче himantopus
• 
  Himantopus himantopus himantopus во лет
• 
  Во време на оперјување
• 
  Во Хаваи