Николај Костер-Валдау

Николај Костер-Валдау (дански: Nikolaj Coster-Waldau; р. 27 јули 1970 г.) — дански театарски и филмски глумец, продуцент и сценарист. Предложен е за наградите „Сатурн“, „Сателит“, „Бодил“, „Изборот на публиката“ и награда на „Здружението на киноглумците“.^[1] Познати филмови со негово учество се „Падот на црниот јастреб“, „Небесно Царство“, „Забранет пристап“, „Ловци на глави“, „Заборав“ и сериите „Новиот Амстердам“ и „Игра на тронови“. Во 2011 г., страницата BuddyTV го сместила на 85-то место на нивниот список на „100-те најпривлечни мажи во светот“.^[2]

Николај Костер-Валдау
Костер-Валдау на 72. берлински меѓународен кинофестивал во 2022 г.
Роден(а)	Николај Костер-Валдау 27 јули 1970(1970-07-27) (55 г.) Рудкобинг, Данска
Образование	Данска национална школа за сценски уметности
Занимање	глумец, кинопродуцент, сценарист
Активен период	1993 — сѐ уште
Сопружник	Нукака Моцфелд (в. 1998)
Деца	2

Животопис

Николај Костер-Валдау е роден на 27 јули 1970 г. во Рудкобинг, Данска, во семејството на Јорген Оскар Фрицер Валдау (татко му) и Хане Соборг Костер (мајка му). Неговиот татко работел во Гренланд, додека неговата мајка била книжничарка.^[3] Откако неговите родители се развеле, Николај и неговите две постари сестри првенствено ги одгледувала нивната мајка. Својата страст за глума ја продолжил во Националната театарска школа во Копенхаген од 1989 до 1993 г.

Во 1998 г., Николај се оженил за гренландската пејачка, глумица и поранешна мис Гренланд, Нукака Моцфелд. Парот има две ќерки и во мигов живее во Данска.^[4]