Чифлик (Штипско)

Чифлик — раселено село во Општина Штип, во околината на градот Штип.

За други истоимени места, погледајте Чифлик (појаснување).

Чифлик
Воздушен поглед на Чифлик
Чифлик Местоположба на Чифлик во Македонија Чифлик на карта
Координати 41°42′00″N 22°18′00″E
Регион	Источен
Општина	Штип
Население	0 жит. (поп. 2021)[1]
Пошт. бр.	2000
Повик. бр.	032
Шифра на КО	30069
Надм. вис.	600 м
Чифлик на општинската карта Атарот на Чифлик во рамките на општината
Чифлик на Ризницата

Географија и местоположба

Воздушен поглед на обработливи површини во атарот на селото

Селото се наоѓа во југоисточниот дел на Општина Штип, на стариот пат кој водел од градот Штип за Радовиш, но не во долината на Крива Лакавица.^[2] Селото е ридско, сместено на надморска височина од 600 метри.^[2]

Селото се наоѓа во западните падини на Плачковица, оддалечено 12 километри јужно од Штип.

До селото води земјен пат, кој започнува од самиот град Штип, но може и да се пристапи од селото Љуботен.

Стопанство

Атарот на селото зафаќа простор од 6,8 километри квадратни. На него преовладуваат шумите на површина од 390 хектари, на пасиштата отпаѓаат 174 хектари, а на обработливото земјиште отпаѓаат 97 хектари.^[2]

Население

Население во минатото

Година Нас. ±% 1948 100 —     1953 98 −2.0% 1961 88 −10.2% 1971 50 −43.2% 1981 24 −52.0%	Година Нас. ±% 1991 7 −70.8% 1994 9 +28.6% 2002 7 −22.2% 2021 0 −100.0%

Според статистиката на Васил К’нчов („Македонија, Етнографија и статистика“) од 1900 година, во Чифлик живееле 602 жители, сите Македонци.^[3]

Според егзархискиот секретар Димитар Мишев, („La Macédoine et sa Population Chrétienne“) во 1905 година во Чифлик имало 688 жители, сите Македонци под врховенството на Бугарската егзархија.^[4]

Според германска карта издадена во 1941 година, а заснована на пописот на Кралството Југославија од 1931 година, селото имало 25 до 50 Македонци.^[5]

Селото е мало, населено со македонско население и е во фаза на целосно раселување. Тоа, во 1961 година броело 88 жители, а во 1994 година бројот се намалил на само девет жители.^[2]

Според пописот од 2002 година, во селото живееле 7 жители, сите Македонци.^[6]

Според последниот попис од 2021 година, во селото немало жители.

Во табелата во продолжение е направен преглед на населението во сите пописни години:

Година	1900	1905	1948	1953	1961	1971	1981	1991	1994	2002	2021
Население	602	688	100	98	88	50	24	7	9	7	0

Извор за 1900 г.: Македонија. Етнографија и статистика.^[7]; за 1905 г.: La Macédoine et sa Population Chrétienne.^[8]; за 1948-2002 г.: Државен завод за статистика на РМ.^[9]; за 2021 г.: Државен завод за статистика на РМ.^[10]

Самоуправа и политика

На крајот од XIX век, Чифлик било село во Штипската Каза на Отоманското Царство.

Селото влегува во рамките на Општина Штип, една од ретките општини која не била променета при новата територијална поделба на Македонија во 2004 година. Во периодот од 1996-2004 година, селото било во рамките на некогашната Општина Штип.

Во периодот 1957-1996 година, селото се наоѓало во рамките на големата Општина Штип. Во периодот од 1955 до 1957 година, селото влегувало во рамките на тогашната општина Лакавица.

Во периодот 1952-1955, селото било дел од тогашната општина Лакавица, во која покрај селото Чифлик се наоѓале селата Балталија, Брест, Гарван, Горачино, Загорци, Лакавица, Лесковица, Липов Дол, Љуботен, Ново Село, Пиперово, Пухче, Скоруша, Степанци, Суво Грло, Танатарци и Шопур. Во периодот 1950-1952, селото било дел од некогашната општина Долани, во која влегувале селата Долани, Липов Дол, Љуботен и Чифлик.

Избирачко место

Селото е опфатено во избирачкото место бр. 2311 според Државната изборна комисија, сместено во простории на продавница во селото Љуботен. Во ова избирачко место се опфатени и селата Љуботен и Липов Дол.^[11]

На претседателските избори во 2019 година, на ова избирачко место биле запишани вкупно 35 гласачи.^[12] На локалните избори во 2021 година, на ова избирачко место биле запишани вкупно 35 гласачи.^[13]

Галерија

• 
  Традиционална куќа
• 
  Селска чешма

Поврзано

• Општина Штип