Windows NT

Windows NT (скрат. од англ. New Technology) — серија оперативни системи (ОС) на корпорацијата Microsoft и име на првите верзии на ОС.

Работната површина на Windows 11 — лентата со задачи и главното мени се стандардно центрирани.

Windows NT бил развиен на почетокот на 1990-тите по прекинот на соработката на Microsoft и IBM на OS/2. Се развивал одделно од другите ОС од семејството на Windows (Windows 3.x и Windows 9x) и, за разлика од нив, бил претставен како сигурно решение за работни станици (Windows NT Workstation) и опслужувачи (Windows NT Server).

Windows NT бил почетокот на семејството оперативни системи, во кое влегуваат: Windows NT 3.1, Windows NT 3.50, Windows NT 3.51, Windows NT 4.0, Windows 2000, Windows XP, Windows XP Professional x64 Edition, Windows Server 2003, Windows Vista, Windows Server 2008, Windows 7, Windows Server 2008 R2, Windows 8, Windows 8.1, Windows Server 2012, Windows Server 2012 R2, Windows 10, Windows Server 2016, Windows Server 2019, Windows 11, Windows Server 2022, Windows Server 2025.^[1]

Линија на производи

Windows NT е група или семејство на производи — исто како што Windows е група или семејство. Windows NT е подгрупа на Windows.

Првата верзија на Windows NT, 3.1, била произведена за работни станици и опслужувачки сметачи. Била комерцијално сосредоточена и наменета да ги надополни потрошувачките верзии на Windows што биле засновани на MS-DOS (вклучувајќи ги Windows 1.0 до Windows 3.1x). Во 1996 г., бил објавен Windows NT 4.0, кој го вклучувал новиот кориснички интерфејс од Windows 95.

Со текот на времето, Microsoft ја вклучил технологијата на Windows NT во серијата производи на Windows за лични сметачи и го исфрлил од употреба семејството Windows 9x. Почнувајќи со Windows 2000, „NT“ било отстрането од името на производот, но сѐ уште е присутно на неколку ниски нивоа во системот — вклучувајќи и како дел од верзијата на производот за некое време.^[2]