Конска Река

Конска Река, се среќава и како Коњска Река, Сува Река или Цреша — река во Југоисточна Македонија и десна притока на Вардар. Таа е последната поголема притока на Вардар во Македонија.

Конска Река Коњска Река Цреша
Поглед на реката од мостот при влезот на селото Моин
Местоположба
Физички особености
Извор
• место	Кожуф (од Кичи Кај)
• надм. вис.	1520 м
Устие
• место	Вардар (кај Гевгелија)
• координати	41°08′33.5″N 22°31′37.2″E
• надм. вис.	44 м
Должина	30 км
Големина на сливот	180 км2
Особености на сливот
Течение	Вардар → Егејско Море

Течение

Конска Река извира од месноста Кичи Кај на планината Кожуф, на надморска височина од 1520 м. Нејзиното течение продолжува по падините на Кожуф во правец запад-исток, по што навлегува во Гевгелиското Поле. Таа поминува покрај селата Конско, Ново Конско, Моин, како и јужно од градот Гевгелија. Се влева во Вардар од нејзината десна страна, во близина на Гевгелија, на надморска височина од 44 м.^[1][2]

Хидрографија

Вкупната должина на реката изнесува 30 км. Нејзиното сливно подрачје зафаќа површина од 180 км² и истото припаѓа на Егејскиот речен слив. Реката извира на надморска височина од 1520 м, а се влева на височина од 44 м, при што вкупната висинска разлика изнесува 1476 м, а просечниот релативен пад 49‰.^[2] Средниот годишен проток на реката изнесува 0,62 м³/сек.^[3]

На реката се наоѓа вештачкото Конско Езеро.

Стопанство

Можностите за искористување на водите од Конска Река биле разгледувани уште во 1973 година, кога бил изработен идеен проект во кој биле одредени и анализирани неколку алтернативни решенија за користење на речните води заради обезбедување на бараното количество вода со најниски трошоци и најмало влијание врз животната средина. Со проектот било предвидено и изградба на брана на околу 20 км од вливот на реката во Вардар.^[4] Предлогот за изградба на брана и хидроелектрана бил повторно актуализиран во Стратегијата за одржлив развој на Општина Гевгелија за периодот 2006-2011 година, во којашто бил предвиден проект за изградба на ХЕЦ „Конска Река“ со моќност од 278 kW и планирано годишно производство од 1,1 милиони kW/h, како и проект за изградба на ХМС „Конска Брана“ со зафатнина од 20.000.000 м³.^[5][6] Во 2014 година била изработена студија за оценка на влијанието од изградбата на браната „Конско“ врз животната средина.^[7]

Галерија

Реката од мостот кој води до селото Ума

• 
• 
• 
• 

Реката кај месноста Смрдлива Вода

• 
• 

Поврзано

• Кожуф
• Гевгелиско Поле
• Конско
• Ново Конско
• Вардар