എം.പി. വീരേന്ദ്രകുമാർ

എം.പി. വീരേന്ദ്രകുമാർ രാഷ്ട്രീയനേതാവും സാഹിത്യകാരനും പ്രഭാഷകനുമായിരുന്നു.14-‌‍‌‌ആം ലോകസഭയിൽ കോഴിക്കോട് ലോക്സഭാ മണ്ഡലത്തെ പ്രതിനിധീകരിക്കുന്ന അംഗമായിരുന്നു ഇദ്ദേഹം. മരണസമയത്ത് കേരളത്തിൽ നിന്നുള്ള രാജ്യസഭാഗം ആണ് ജനതാദൾ (എസ്), സോഷ്യലിസ്റ്റ് ജനത (ഡെമോക്രാറ്റിക് ) ജനതാ ദൾ (യുണൈറ്റഡ്) എന്നിവയുടെ മുൻ സംസ്ഥാന കമ്മിറ്റി പ്രസിഡന്റ്. ലോക് താന്ത്രിക് ജനതാദൾ പാർട്ടിയുടെ സ്ഥാപക നേതാവാണ്. മാതൃഭൂമി ദിനപത്രത്തിന്റെ ചെയർമാനും മാനേജിങ് എഡിറ്ററും മലബാറിലെ പ്രമുഖ പ്ലാന്ററുമാണ് ഇദ്ദേഹം. 2020 മെയ് 28ന് ഹൃദയാഘാതത്തെ തുടർന്ന്^[1] ഇദ്ദേഹം അന്തരിച്ചു.^[2]

എം.പി. വീരേന്ദ്രകുമാർ
രാജ്യസഭ
മണ്ഡലം	കേരളം
വ്യക്തിഗത വിവരങ്ങൾ
ജനനം	(1936-07-22)22 ജൂലൈ 1936 വയനാട്, കേരളം
മരണം	(2020-05-28)28 മേയ് 2020
രാഷ്ട്രീയ കക്ഷി	ലോക് താന്ത്രിക് ജനതാദൾ
പങ്കാളി	ഉഷ വീരേന്ദ്രകുമാർ
കുട്ടികൾ	1 മകനും 3 പെൺമക്കളും
വസതി	വയനാട്

ജീവിതരേഖ

സോഷ്യലിസ്റ്റ് പാർട്ടി നേതാവും മദ്രാസ് നിയമസഭാംഗവുമായിരുന്ന എം.കെ. പത്മപ്രഭാഗൗഡറുടേയും മരുദേവി അവ്വയുടേയും മകനായി 1936 ജൂലൈ 22 ന്‌ കല്പറ്റയിൽ ജനനം.^[3] മദിരാശി വിവേകാനന്ദ കോളേജിൽ നിന്ന് തത്ത്വശാസ്ത്രത്തിൽ ബിരുദാനന്തര ബിരുദവും അമേരിക്കയിലെ സിൻസിനാറ്റി സർവകലാശാലയിൽ നിന്ന് എം.ബി.എ. ബിരുദവും കരസ്ഥമാക്കി.^[3] 1987 കേരള നിയമസഭാംഗവും വനംവകുപ്പ് മന്ത്രിയുമായി. 48 മണിക്കൂറിനുള്ളിൽ തന്നെ മന്ത്രിസ്ഥാനം രാജിവെച്ചു. കേന്ദ്രമന്ത്രിസഭയിൽ ധനകാര്യ സഹമന്ത്രിയും പിന്നീട് തൊഴിൽ വകുപ്പിന്റെ സ്വതന്ത്രചുമതലയുള്ള സഹമന്ത്രിയുമായി സേവനമനുഷ്ഠിച്ചിട്ടുണ്ട്. അടിയന്തരാവസ്ഥ കാലയളവിൽ ഒളിവിൽ പോയെങ്കിലും പിടിയിലായി ജയിൽവാസമനുഭവിച്ചു^[3][4]. സ്കൂൾ വിദ്യാർത്ഥി ആയിരുന്ന കാലത്ത് സോഷ്യലിസ്റ്റ് പാർട്ടി നോതാവായിരുന്ന ജയപ്രകാശ് നാരായൺ ആണ് പാർട്ടിയിൽ അംഗത്വം നൽകിയത്.^[5]

തിരഞ്ഞെടുപ്പുകൾ

തിരഞ്ഞെടുപ്പുകൾ ^{[6] [7]}

വർഷം	മണ്ഡലം	വിജയി	പാർട്ടി	മുഖ്യ എതിരാളി	പാർട്ടി
2014	പാലക്കാട് ലോകസഭാമണ്ഡലം	എം.ബി. രാജേഷ്	സി.പി.എം., എൽ.ഡി.എഫ്	എം.പി. വീരേന്ദ്രകുമാർ	എസ്.ജെ.ഡി., യു.ഡി.എഫ്.
2004	കോഴിക്കോട് ലോകസഭാമണ്ഡലം	എം.പി. വീരേന്ദ്രകുമാർ	ജെ.ഡി.എസ്., എൽ.ഡി.എഫ്.	വി. ബാലറാം	കോൺഗ്രസ് (ഐ.), യു.ഡി.എഫ്
1996	കോഴിക്കോട് ലോകസഭാമണ്ഡലം	എം.പി. വീരേന്ദ്രകുമാർ	ജനതാദൾ എൽ.ഡി.എഫ്.	കെ. മുരളീധരൻ	കോൺഗ്രസ് (ഐ.), യു.ഡി.എഫ്.
1991	കോഴിക്കോട് ലോകസഭാമണ്ഡലം	കെ. മുരളീധരൻ	കോൺഗ്രസ് (ഐ.), യു.ഡി.എഫ്.	എം.പി. വീരേന്ദ്രകുമാർ	ജനതാദൾ എൽ.ഡി.എഫ്.

രാജ്യസഭ കാലഘട്ടവും പാർട്ടിയും

• 2018-2020 : ജനതാ ദൾ, എൽ.ഡി.എഫ്.
• 2016-2017 : ജനതാ ദൾ, യു.ഡി.എഫ്. (രാജി വെച്ചു)

കൃതികൾ

കൃതികൾ	പുരസ്കാരങ്ങൾ
ഹൈമവതഭൂവിൽ	കേന്ദ്ര സാഹിത്യ അക്കാദമി പുരസ്കാരം(2010)[8], മൂർത്തീദേവി പുരസ്കാരം (2016 [14])
സ്മൃതിചിത്രങ്ങൾ
അമസോണും കുറേ വ്യാകുലതകളും	കേരള സാഹിത്യ അക്കാദമി പുരസ്കാരം(2002)[9][10]
ചങ്ങമ്പുഴ:വിധിയുടെ വേട്ടമൃഗം
ആത്മാവിലേക്ക് ഒരു തീർത്ഥയാത്ര	ഓടക്കുഴൽ പുരസ്കാരം
ലോകവ്യാപാരസംഘടനയും ഊരാക്കുടുക്കുകളും
തിരിഞ്ഞുനോക്കുമ്പോൾ
പ്രതിഭയുടെ വേരുകൾ തേടി
അധിനിവേശത്തിന്റെ അടിയൊഴുക്കുകൾ
ഗാട്ടും കാണാച്ചരടുകളും
രോഷത്തിന്റെ വിത്തുകൾ
രാമന്റെ ദുഃഖം
സമന്വയത്തിന്റെ വസന്തം
ബുദ്ധന്റെ ചിരി
വിവേകാനനന്ദൻ- സന്യാസിയും മനുഷ്യനും

പുരസ്കാരങ്ങൾ

• സി.എച്ച്‌. മുഹമ്മദ്‌കോയ സ്മാരക പുരസ്കാരം (1991) ^[11]
• സി.ബി. കുമാർ എൻഡോവ്‌മെന്റ്‌ (1995)^[11]
• ജി. സ്‌മാരക പുരസ്കാരം (1996) ^[11]
• ഓടക്കുഴൽ പുരസ്കാരം (1997) ^[11]
• കേസരി സ്മാരക അവാർഡ് (1998) ^[11]
• നാലപ്പാടൻ പുരസ്കാരം (1999) ^[11]
• അബുദാബി ശക്തി പുരസ്കാരം (2002) ^[11]
• കെ.സുകുമാരൻ ശതാബ്ദി അവാർഡ് (2002) ^[11]
• വയലാർ അവാർഡ് (2008) ^[11]
• സി. അച്യുതമേനോൻ പുരസ്കാരം (2009) ^[11]
• കേന്ദ്ര സാഹിത്യ അക്കാദമി പുരസ്കാരം (2010) ^[11]
• എം.ഇ.എസ്‌. എക്‌സലെൻസ്‌ പുരസ്കാരം
• ദുബായ്‌ കൈരളി കലാ കേന്ദ്ര പുരസ്കാരം
• ഭാരത്‌ സൂര്യ പുരസ്കാരം
• ദർശൻ കൾച്ചറൽ പുരസ്കാരം
• കൊടുപുന്ന സ്മാരക പുരസ്കാരം
• വി.ആർ. കൃഷ്ണനെഴുത്തച്ഛൻ ജന്മശദാബ്ദി അവാർഡ്-2009^[12]
• കേരളസാഹിത്യ അക്കാദമിയുടെ വിശിഷ്ടാംഗത്വം - 2013^[13]
• മൂർത്തീദേവി പുരസ്കാരം (2016 ^[14]) ഹൈമവതഭൂവിൽ എന്ന കൃതിക്ക് ^[15]

കുടുംബം

ഇദ്ദേഹത്തിന്റെ മകൻ എം.വി. ശ്രേയാംസ് കുമാർ കേരളത്തിലെ രാഷ്ട്രീയ നേതാവും എം.എൽ.എ.യുമാണ്. ഭാര്യ: ഉഷ മക്കൾ: ആഷ, നിഷ, ജയലക്ഷ്മി, ശ്രേയാംസ് കുമാർ (ലോക് താന്ത്രിക് ജനതാ ദൾ സംസ്ഥാന പ്രസിഡണ്ട് , മാതൃഭൂമി ജോ. മാനേജിംഗ് ഡയറക്ടർ ) മരുമക്കൾ : കവിത ശ്രേയാംസ് കുമാർ , ദീപക് ബാലകൃഷ്ണൻ, എം.ഡി. ചന്ദ്രനാഥ്

മരണം

2020 മെയ് 28 അർദ്ധരാത്രിയിൽ ഹൃദയാഘാതത്തെ തുടർന്ന് കോഴിക്കോടുള്ള ഒരു സ്വകാര്യ ആശുപത്രിയിൽ വെച്ചായിരുന്നു അദ്ദേഹത്തിന്റെ നിര്യാണം.^[16] മൃതദേഹം മാതൃഭൂമി ഓഫീസിൽ പൊതുദർശനത്തിന് വച്ചശേഷം വയനാട് പുളിയാർമലയിലെ വീട്ടിലേയ്ക്ക് കൊണ്ടുപോകുകയും പൂർണ ഔദ്യോഗിക ബഹുമതികളോടെ വീട്ടുവളപ്പിൽ സംസ്കരിയ്ക്കുകയും ചെയ്തു. അദ്ദേഹത്തിന്റെ ഭാര്യ ഉഷ, 2022 ഒക്ടോബർ 28-ന് അന്തരിച്ചു.