സരാറ്റോഗ, അമേരിക്കൻ ഐക്യനാടുകളിലെ സംസ്ഥാനമായ കാലിഫോർണിയയിൽ, സാന്താ ക്ലാരാ കൌണ്ടിയിൽ സ്ഥിതിചെയ്യുന്ന ഒരു നഗരമാണ്. സാന്താ ക്ലാര താഴ്വരയുടെ പടിഞ്ഞാറ് ഭാഗത്തു സ്ഥിതി ചെയ്യുന്ന ഈ നഗരം, സാൻ ഫ്രാൻസിസ്കോ ഉൾക്കടൽ മേഖലയിൽ സാൻ ജോസ് നഗരത്തിനു നേരിട്ട് പടിഞ്ഞാറായിട്ടാണ് നിലനിൽക്കുന്നത്. 2010 ലെ യു.എസ്. സെൻസസ് പ്രകാരമുള്ള ഈ നഗരത്തിലെ ആകെ ജനസംഖ്യ 29,926 ആയിരുന്നു. സിലിക്കോണ് വാലിയുടെ പടിഞ്ഞാറേ വക്കിൽ സ്ഥിതിചെയ്യന്ന സരാറ്റോഗ, ഒരു ചെറു പട്ടണത്തിന്റ അനുഭവം പ്രദാനം ചെയ്യുന്നതോടൊപ്പം ഇവിടെയുള്ള വീഞ്ഞുത്പാദനകേന്ദ്രങ്ങൾ ഹൈ-എൻഡ് റെസ്റ്റോറന്റുകൾ എന്നിവയുടെ പേരിലും ഈ നഗരം അറിയപ്പെടുന്നു. വില്ല മൊണ്ടാൽവോ, ഹാക്കോൺ ഗാർഡൻസ്, മൌണ്ടൻ വൈനരി എന്നിവ ഈ നഗരത്തിലെ പ്രധാന ആകർഷണങ്ങളിൽ ഉൾപ്പെടുന്നു.