Netuno (planeta)
From Wikipedia, the free encyclopedia
Netuno (ó Neptuno) ye l'uitabo planeta de l Sistema Solar, i l redadeiro, an orde d'afastamiento a partir de l Sol, zde la reclassificaçon de Pluton pa la catadorie de planeta nano. Netuno recebiu l nome de l dius romano de ls mares. Ye l quarto maior planeta an diámetro, i l terceiro maior an massa. Netuno ten 17 bezes la massa de la Tierra i ye lhigeiramente mais maciço de l que Ourano, que ten cerca de 15 bezes la massa de la Tierra i ye menos denso.[1] L sou simblo astronómico ye , ua berson stelizada de l tridente de l dius Netuno.
Çcubierto an 23 de Setembre de 1846,[2] Netuno fui l purmeiro planeta ancuntrado por ua prebison matemática, an beç dua ouserbaçon ampírica. Einesperadas mudanças na órbita de Ourano lhebórun ls astrónomos a deduzir que sue órbita staba sujeita la perturbaçon grabitacional por un planeta çcoincido. Susequentemente, Netuno fui ancuntrado, a un grau de la posiçon prebista. La sue maior lhuna, Triton, fui çcubierta pouco tiempo depuis, mas nanhue de las outras 12 lhunas de l planeta fúrun çcubiertas antes de l seclo XX. Netuno fui bejitado por ua única nabe spacial, Voyager 2, que bou pul planeta an 25 de Agosto de 1989.
La cumposiçon de Netuno ye semelhante a la cumposiçon de Ourano, i ambos ténen cumposiçones defrentes de las de ls maiores gigantes gazosos Júpiter i Saturno. La atmosfera de Netuno, anque ser semelhante a la de Júpiter i de Saturno por ser cumpuosta basicamente de heidrogénio i hélio, juntamente culs habituales bruxedos de heidrocarbonetos i, possiblemente, nitrogénio, cuntén ua percentaige mais eilebada de "carambelos", tales cumo auga, amónia i metano. Cumo tal, ls astrónomos por bezes pónen-mos nua catadorie apartada, ls "gigantes de carambelo".[3] An cuntreste, l'anterior de Netuno ye cumpuosto percipalmente de carambelo i peinhas, cumo l de Ourano.[4] Eisísten traços de metano nas regiones ultraperiféricas que ajúdan, an parte, pa l'aparéncia azul de l planeta.[5]
An ouposiçon a la relatibamente monótona atmosfera de Ourano, l'atmosfera de Netuno ye notable puls sous padrones climáticos atibos i besibles. Netuno ten ls bentos mais fuortes de qualquiera planeta ne l sistema solar, que puoden chegar a atingir ls 2100 quilómetros por hora.[6] Na altura de l bo de la Boyager 2, por eisemplo, l sou heimisfério sul possuía ua Grande Mancha Scura, cumparable a la Grande Mancha Burmeilha de Júpiter. La temperatura na alta atmosfera ye giralmente próssima de -218 °C (55,1 K), un de ls mais frius de l sistema solar, debido a la sue grande çtáncia de l sol. La temperatura ne l centro de la Netuno ye de cerca de 7000 °C (7270 K)[7][8], l que ye cumparable a la de la superfice de l Sol i semelhante a l'ancontrada ne l centro de la maiorie de ls outros planetas de l sistema solar. Netuno ten un pequeinho i fragmentado sistema de anielhos, que puode tener sido detetado durante la década de 1960, mas solo fui cunfirmado andiscutibelmente pula Boyager 2.[9]