တပ်ကုန်းမြို့နယ်
မြန်မာနိုင်ငံ၊ နေပြည်တော်ပြည်ထောင်စုနယ်မြေရှိ မြို့နယ် From Wikipedia, the free encyclopedia
Remove ads
တပ်ကုန်းမြို့နယ် (/'tæt koʊn/) သည် နေပြည်တော် ပြည်ထောင်စုနယ်မြေတွင် ပါဝင်သော မြို့နယ်တစ်ခုဖြစ်သည်။ ၂၀၁၄ ခုနှစ် သန်းခေါင်စာရင်းအရ တပ်ကုန်းမြို့နယ်ရှိ လူဦးရေမှာ ၂၁၇,၀၉၃ ယောက်[၁] ဖြစ်ပြီး ရုံးစိုက်ရာမြို့မှာ တပ်ကုန်းမြို့ ဖြစ်သည်။
တပ်ကုန်းမြို့နယ်အား ၁၉၅၇ ခုနှစ်၊ နိုဝင်ဘာလ (၃၀)ရက်နေ့တွင် ကာကွယ်ရေးဝန်ကြီး ဦးဘဆွေ ကြွရောက်၍ မြို့နယ်ဖွင့်ပွဲ ကျင်းပခဲ့ပြီး ပြည်ထဲရေးဌာန၊ မြို့နယ်အုပ်ချုပ်ရေးဌာနခွဲ၏ (၅-၇-၁၉၆၀)နေ့စွဲပါ အမိန့်ကြော်ငြာစာအမှတ်(၅၇၃)ဖြင့် တရားဝင်မြို့နယ်အဖြစ် အသိအမှတ်ပြုခဲ့သည်။ ပထမဆုံးမြို့ပိုင်မှာ ဦးထွန်းမောင် ဖြစ်ပြီး ၁၃၁၃ ခု၊ နတ်တော်လဆန်း (၉)ရက်နေ့တွင် တာဝန်ထမ်းဆောင်သည်။ [၂]
Remove ads
နောက်ခံသမိုင်း
တပ်ကုန်းမြို့နယ်တဝိုက် ဧရိယာများသည် ပျူခေတ်ကတည်းက အခြေချနေထိုင်မှုများရှိခဲ့သည်ဟု ယူဆကြသည်။ အထူးသဖြင့် ညောင်ကိုင်းကျေးရွာအနီးတွင် ရှေးမြို့ဟောင်းရာနှင့် ပျူသင်္ချိုင်းရာများ တွေ့ရှိထားသည်။
ပုဂံခေတ် အနော်ရထာ၏ နယ်ခြား(၄၃)မြို့တည်ရာတွင် တပ်ကုန်းမြို့နယ်မှ ရွှေမြို့သည် တစ်ခုအပါအဝင် ဖြစ်လာသည်။
ကနဦး ရမည်းသင်းစား၏ အုပ်ချုပ်မှုအောက်တွင် ရှိနေရာမှ သက္ကရာဇ် ၈၄၇ ခုနှစ် တောင်ငူကို မင်းကြီးညို ဆက်ခံသောအခါ ညောင်လွန့်နယ်အထိ တောင်ငူပိုင်နက်အတွင်းသို့ ရောက်လာခဲ့သည်။ တပ်ကုန်းမြို့နယ်အတွင်းမှ ရွှေမြို့နှင့် ကင်းသာတို့သည် တောင်ငူ(၅၂)မြို့တွင် ပါဝင်လာသည်။
၁၈၅၂ ခုနှစ်၊ ဒုတိယအင်္ဂလိပ်-မြန်မာစစ်ပွဲအပြီးတွင် ရေနီအထိ အင်္ဂလိပ်တို့သိမ်းယူခြင်း ခံရပြီး တပ်ကုန်းမြို့နယ်ဧရိယာများသည် မြန်မာဘုရင်အုပ်ချုပ်မှုအောက်တွင် ကျန်ရှိပြီး ရမည်းသင်းနယ် အုပ်ချုပ်မှုအောက်သို့ ပြန်ရောက်သည်။
ယနေ့ခေတ်တပ်ကုန်းနယ်ဧရိယာများသည် ကိုလိုနီခေတ်တွင် အရှေ့ပိုင်းတိုင်း(Eastern Division)၊ ပျဉ်းမနားခရိုင်အောက် ပေါင်းလောင်းမြို့နယ်၊ တောင်ညိုမြို့နယ်နှင့် ရမည်းသင်းခရိုင်အောက် ရမည်းသင်းမြို့နယ်များတွင် ပါဝင်သည်။ ယေဘုယျအားဖြင့် ဆင်သေချောင်း၏ မြောက်ပိုင်းနယ်များသည် ရမည်းသင်းခရိုင်တွင် ပါဝင်ပြီး ဆင်သေချောင်း၏တောင်ပိုင်းနယ်များသည် ပျဉ်းမနားခရိုင်တွင် ပါဝင်သည်။
လွတ်လပ်ရေးရပြီးနောက် ၁၉၅၇ ခုနှစ်တွင် မြို့နယ်ဖွင့်ပွဲကို ကျင်းပခဲ့ပြီး ၁၉၆၀ တွင် ပြည်ထဲရေးဌာန၏ တရားဝင်အမိန့်ကြေညာချက်ဖြင့် တရားဝင်မြို့နယ်ဖြစ်လာသည်။
ထို့နောက် ခေတ်အဆက်ဆက် မန္တလေးတိုင်း၊ ရမည်းသင်းခရိုင်အတွင်းရှိ မြို့နယ်အဖြစ်ရှိရာမှ ၂၀၀၆ခုနှစ် နေပြည်တော်တည်ရန် ပျဉ်းမနားခရိုင်ဖွဲ့စည်းသည့်အခါ ပျဉ်းမနားခရိုင်အတွင်းသို့ ရောက်ရှိသည်။ နေပြည်တော်၏ သီရိ(၅)မြို့နယ်အသစ်ဖွဲ့စည်းသည့်အခါ တပ်ကုန်းမြို့နယ်မှ နန်းဩ၊ ခေတ်အေး၊ ကျောက်ဖြာ၊ ဝဲကြီး၊ ဖြုတ်ခွဲ၊ ပုဇွန်ဆိပ်၊ ညောင်လူး၊ တက်ရှိန်း၊ စသည့် တောင်ဘက်ပိုင်း ကျေးရွာအုပ်စုများ ပါဝင်သွားသည်။ထို့နောက် ၂၀၀၈ ခုနှစ် ဖွဲ့စည်းပုံအခြေခံဥပဒေအရ ၂၀၁၀ တွင် နေပြည်တော်ကောင်စီနယ်မြေ၊ ဥတ္တရခရိုင်တွင်ပါဝင်သောမြို့နယ် ဖြစ်လာသည်။[၃]
Remove ads
ပထဝီအနေအထား
တပ်ကုန်းမြို့နယ်သည် အရှေ့ဘက် ရှမ်းရိုးမတောင်တန်းနှင့် အနောက်ဘက် ပဲခူးရိုးမတောင်တန်းကြားတွင် တည်ရှိပြီး မြို့နယ်၏ ၂၀%ခန့်သာ ညီညာပြန့်ပြူးကာ ကျန်ဧရိယာများမှာ သစ်တောများနှင့် လျှိုမြောင်များဖြစ်ကြသည်။ ပင်လယ်ရေမျက်နှာပြင်အထက်အမြင့် ၄၅၀ပေ မှ ၆၂၅၂ပေ အထိ ရှိသည်။ အမြင့်ပေ ၆၂၅၂ပေရှိ ဗျင်ကျယ်တောင်သည် တပ်ကုန်းမြို့နယ်၏အမြင့်ဆုံးတောင်ထိပ်ဖြစ်ပြီး တပ်ကုန်းမြို့နယ်နှင့် ပင်လောင်းမြို့နယ်၏ နယ်နမိတ်လည်း ဖြစ်သည်။
စစ်တောင်းမြစ်၏ မြစ်ဖျားခံရာ ဆင်သေချောင်းနှင့် နဝင်းချောင်းတို့သည် တပ်ကုန်းမြို့နယ်၏ အဓိက ရေဝေချောင်းများ ဖြစ်ပြီး မြောက်မှတောင်သို့ စီးဆင်းသည်။ နဝင်းချောင်းသည် မြို့နယ်ကို မြောက်မှတောင်သို့ အလယ်တည့်တည့်မှ ဖြတ်သန်းစီးဆင်းပြီး ချောင်းဝှမ်းတလျှောက်သည် မြို့နယ်၏ အဓိကမြေပြန့်လွင်ပြင်ဒေသဖြစ်သည်။ ဇီးကုန်း(အဆုံ)ကျေးရွာအနီးတွင် ဆင်သေချောင်းအတွင်းသို့ စီးဝင်ကာ ဆင်သေချောင်းအဖြစ် တောင်ဘက်သို့ ဆက်လက်စီးဆင်းသည်။ အခြားထင်ရှားသော ချောင်းများမှာ ညောင်ကိုင်းချောင်း၊ မုန်ချောင်းနှင့် မြို့လှချောင်းတို့ ဖြစ်သည်။
Remove ads
နယ်နိမိတ်နှင့်အကျယ်အဝန်း
မြောက်ဘက်တွင် မန္တလေးတိုင်းဒေသကြီး၊ ရမည်းသင်းမြို့နယ်၊ အရှေ့ဘက်တွင် ရှမ်းပြည်နယ်၊ ပင်လောင်းမြို့နယ်၊ အနောက်ဘက်တွင် မကွေးတိုင်းဒေသကြီး၊ မြို့သစ်မြို့နယ်နှင့် တောင်ဘက်တွင် နေပြည်တော်ပြည်ထောင်စုနယ်မြေ၊ ဥတ္တရသီရိမြို့နယ်၊ ပုဗ္ဗသီရိမြို့နယ်နှင့် ဇေယျာသီရိမြို့နယ်တို့နှင့် နယ်နိမိတ်ချင်း ထိစပ်နေသည်။ မြို့နယ်အကျယ်အဝန်းမှာ ၆၉၅.၈၈ စတုန်ရန်းမိုင် ရှိပြီး အကျယ်ဆုံးနေရာများတွင် အရှေ့-အနောက် ၄၆မိုင် ၃ဖာလုံခန့်၊ တောင်-မြောက် ၁၈မိုင်၅ဖာလုံခန့် ရှိပါသည်။ [၄]
ရာသီဥတု
တပ်ကုန်းမြို့နယ်သည် ပူပြင်းခြောက်သွေ့သောဒေသနှင့် ပူနွေးစွတ်စိုသောဒေသအကြားတွင် တည်ရှိသည်။ ဇန်နဝါရီလသည် အအေးဆုံးလဖြစ်ပြီး မေလတွင် အပူဆုံးဖြစ်လေ့ရှိသည်။ မိုးရွာသွန်းမှုမှာ ဖေဖော်ဝါရီလတွင် အနည်းဆုံးဖြစ်ပြီး အောက်တိုဘာလတွင် အများဆုံးဖြစ်သည်။
အုပ်ချုပ်ရေး
တပ်ကုန်းမြို့နယ်၏ ရုံးစိုက်ရာမြို့မှာ တပ်ကုန်းမြို့ဖြစ်ပြီး ရပ်ကွက် (၆)ရပ်ကွက်ဖြင့် ဖွဲ့စည်းထားသည်။ ကျေးရွာအုပ်စုပေါင်း (၄၉)ခုရှိရာတွင် ကျေးရွာစုစုပေါင်း (၁၇၆) ရွာ ပါဝင်သည်။ ၂၀၁၄ခုနှစ် သန်းခေါင်စာရင်းအရ မြို့နေလူဦးရေ ၄၁၆၈၃ ဦး (၁၉.၂%)ရှိပြီး ကျန် ၈၀.၈% မှာ ကျေးလက်တွင် နေထိုင်သည်။ မြို့နယ်အတွင်း တပ်ကုန်းတစ်မြို့သာ မြို့အနေဖြင့် ရှိသော်လည်း ညောင်လွန့်နှင့် ရွှေမြို့ကျေးရွာများသည် အစဉ်အလာကြီးမားပြီး စည်ကားအချက်အခြာကျသည့် ရွာကြီးများဖြစ်ကြသည်။ [၅]
Remove ads
စီးပွားရေး
မြို့နယ်၏ အဓိကစီးပွားရေးမှာ စိုက်ပျိုးရေးဖြစ်ပြီး စပါး၊ ပဲ၊ နှမ်း နှင့် သီးနှံများ အဓိကထွက်သည်။
ယဉ်ကျေးမှု
လမ်းပန်းဆက်သွယ်ရေး
ကားလမ်း
တပ်ကုန်းမြို့နယ်သည် ရန်ကုန်-မန္တလေး အမှတ်(၁)ပြည်ထောင်စုအဝေးပြေးလမ်းမကြီး မိုင်တိုင်(၂၆၇/၀)မှ (၂၈၈/၅)အတွင်း တည်ရှိပြီး တပ်ကုန်းမြို့သည် ရန်ကုန်မှ မြောက်ဘက် (၂၇၇)မိုင်အကွာ၊ မန္တလေးမှ တောင်ဘက် (၁၅၆)မိုင်အကွာတွင် အဆိုပါအဝေးပြေးလမ်းမကြီးပေါ်တွင်တည်ရှိသည်။ ရန်ကုန်-မန္တလေးအမြန်လမ်းမကြီးသည် တပ်ကုန်းမြို့နယ်အတွင်း တပ်ကုန်းမြို့၏အနောက်ဘက် မိုင်(၂၀)ခန့်အကွာမှ ဖြတ်သန်းလျက်ရှိသည်။ အမြန်လမ်းမကြီး မိုင်တိုင် (၂၃၃/၄)ဖာလုံအနီးမှ တပ်ကုန်းမြို့သို့ လမ်းခွဲရှိသည်။
နေပြည်တော်-ပင်လောင်းလမ်းသည် တပ်ကုန်းမြို့နယ် ကင်းသာကျေးရွာအနီးရှိ ကင်းသာလမ်းခွဲမှစတင်ပြီး ပင်လောင်းမြို့အထိ (၆၄)မိုင်ခန့် ရှည်လျားသည်။ နေပြည်တော် - ပအို့ဝ်ဒေသမှတဆင့် ကယားပြည်နယ်သို့ဆက်သွယ်ရာတွင် အဓိကအရေးပါဆုံးလမ်းဖြစ်သည်။ အမှတ်(၂)ခရိုင်ချင်းဆက်လမ်းသည်လည်း ကင်းသာကျေးရွာအနီးမှစတင်ပြီး မြောက်ဘက် ရွှေမြင်တင်(ရမည်းသင်း)၊ လှိုင်းတက်(သာစည်) တို့ကို ဆက်သွားသည်။ သို့သော် အဆိုပါလမ်းကို လမ်းတလျောက်ရှိ ကျေးရွာများမှအပ အသုံးပြုမှုနည်းပါးသည်။ ကင်းသာမှ ရွှေကြက်တောင်ကို ဖြတ်၍ နေပြည်တော် ဇေယျာသီရိမြို့နယ်စစ်ရုံးများသို့ ဆက်သွယ်ထားသည့်လမ်းသည် အဆိုပါ ခရိုင်ချင်းဆက်လမ်းကို ထပ်မံတိုးချဲ့ထားသည့်လမ်းဟု ဆိုနိုင်သည်။
တပ်ကုန်းမြို့မှ နေပြည်တော် ဥတ္တရသီရိမြို့သို့ တိုက်ရိုက်ဆက်သွယ်ထားသည့် မြို့ရှောင်လမ်းသည် နေပြည်တော်ဗုဒ္ဓဂါယာဘုရားများနှင့် သံလိုက်စက်ကွင်းကြောင့်မြေစွဲအားဆန့်ကျင်သည်ဟု ဆိုကြသည့်နေရာများကြောင့် လူသိများသည်။ တပ်ကုန်းမြို့မှ နေပြည်တော် ပုဗ္ဗသီရိမြို့သို့ တိုက်ရိုက်ဆက်သွယ်ထားသောလမ်းလည်းရှိသည်။
မီးရထားလမ်း
ရန်ကုန်-တောင်ငူ-မန္တလေး မီးရထားလမ်း၏ တပ်ကုန်းမြို့နယ်အတွင်းရှိလမ်းပိုင်းများသည် ကိုလိုနီခေတ်၊ ၁၈၈၈-၈၉ခုနှစ်ကတည်းက ဖောက်လုပ်ခဲ့ခြင်းဖြစ်ပြီး မြို့နယ်အတွင်း ၁၄.၇၅မိုင်ခန့် ဖြတ်သန်းသည်။ တပ်ကုန်းမြို့တွင် အဓိကဘူတာရုံတစ်ခုနှင့် ညောင်လွန့်၊ မကျီးပင်၊ ဆင်သေ၊ ရွှေမြို့ကျေးရွာများတွင် ဘူတာရုံငယ် (၄)ခုရှိသည်။ ရှေးအခါက ညောင်လွန့်ကျေးရွာမှ အရှေ့ဘက် နတ်တောင်သို့ ဆက်သွယ်ထားသည့် ကုန်ရထားလမ်းတိုမှာ ယခုအခါ ညောင်လွန့်ကျေးရွာမှ အမှတ်(၂)ခရိုင်ချင်းဆက်လမ်းသို့ ဆက်သွယ်ထားသည့် လမ်းတစ်ခု ဖြစ်သွားပြီ ဖြစ်သည်။ တပ်ကုန်းမြို့မှ ပင်လောင်းမြို့သို့ ဆက်သွယ်သည့် မီးရထားလမ်းကို ၂၀၁၀ ခုနှစ်တွင် စတင်ဆောင်ရွက်ခဲ့သော်လည်း စီမံကိန်းတစ်ဝက်တပျက်နှင့် ပြန်လည်ရုပ်သိမ်းခဲ့သည်။
Remove ads
အခြားအရေးကြီးအခြေခံအဆောက်အအုံများ
ရန်ကုန်-မန္တလေးအဝေးပြေးလမ်းမပေါ်ရှိ အဆုံတံတားနှင့် ရန်ကုန်-မန္တလေးမီးရထားလမ်းပေါ်ရှိ ဆင်သေတံတားတို့သည် တပ်ကုန်းမြို့နယ်၏ လမ်းပန်းဆက်သွယ်ရေးအတွက် အရေးအကြီးဆုံးတံတားများဖြစ်သည်။
ပညာရေး
၂၀၂၀ ခုနှစ်စာရင်းအရ တပ်ကုန်းမြို့နယ်အတွင်း အခြေခံပညာကျောင်းများအနေဖြင့် အထက်တန်းကျောင်း ၁၄ ကျောင်း၊ အထက်တန်းကျောင်းခွဲ ၁၄ ကျောင်း၊ အလယ်တန်းကျောင်း ၁၅ ကျောင်း၊ အလယ်တန်းကျောင်းခွဲ ၁၈ ကျောင်း၊ မူလတန်းကျောင်း ၆၁ ကျောင်း နှင့် မူလတန်းလွန်ကျောင်း ၃၉ ကျောင်း ရှိသည်။ ထို့ပြင် ရွှေမြို့၊ ကျောက်စရစ်ကုန်း၊ သဖန်းချောင်း နှင့် ဥသျှစ်ကုန်းကျေးရွာများတွင် ဘုန်းတော်ကြီးသင်ပညာရေးကျောင်းများ ရှိသည်။ [၄]
ကျန်းမာရေး
တပ်ကုန်းမြို့နယ်အတွင်း ဆေးရုံ ၂ ရုံနှင့် ကျေးလက်ကျန်းမာရေးဌာန ၄ ခုရှိသည်။ မြို့နယ် ကုတင် ၁၀၀ ပြည်သူ့ဆေးရုံသည် တပ်ကုန်းမြို့ပေါ်တွင် တည်ရှိသည်။ မူလ အောင်ဇေယျရပ်ကွက်တွင်တည်ရှိသည့် ဆေးရုံဟောင်းနေရာမှ ၂၀၁၁ ခုနှစ်တွင် မြို့မြောက်ဘက်အထွက်ရှိ မြသီတာပန်းခြံနေရာသို့ ပြောင်းရွှေ့ခဲ့သည်။ ဆေးရုံဟောင်းနေရာအား သံဃာ့ဆေးရုံနှင့် မိခင်နှင့်ကလေးကျန်းမာရေးဌာနအဖြစ် ဆက်လက်အသုံးပြုသည်။ ဒုတိယဆေးရုံမှာ ရွှေမြို့ကျေးရွာရှိ ၁၆ ကုတင်ဆံ့ တိုက်နယ်ဆေးရုံဖြစ်သည်။ ညောင်လွန့်၊ မြောက်မြိုက်၊ တောင်ပို့သာ နှင့် အိုင့်ကျယ်ကျေးရွာများတွင် ကျေးလက်ကျန်းမာရေးဌာနများ ရှိသည်။
Remove ads
အထင်ကရ နေရာများ
- ညောင်လွန့်တောရကျောင်းတိုက်
- ပဋိပတ္တိသာသနာတွင် ရဟန္တာဟု ကျော်ကြားထင်ရှားသော ညောင်လွန့်တောရဆရာတော်ကြီး ဦးမေဓာဝီ သီတင်းသုံးခဲ့ရာ တောရကျောင်းတိုက်ကြီးဖြစ်သည်။ ညောင်လွန့်ကျေးရွာအနောက်ဘက် ၁ မိုင်ခန့်အကွာတွင် တည်ရှိပြီး ဧက ၈၀ ခန့်ကျယ်ဝန်းသည်။
- နေပြည်တော်မြန်မာ့အသံ
- ကနဦးရေဒီယိုစမ်းသပ်ထုတ်လွှင့်မှုများတွင် "နေပြည်တော်မြန်မာ့အသံ"ဟူသောအမည်ကို အသုံးပြုရာမှ နေပြည်တော်မြန်မာ့အသံဟု လူသိများသော်လည်း ရေဒီယိုရော ရုပ်သံပါထုတ်လွှင့်သည့် မြန်မာ့အသံနှင့် ရုပ်မြင်သံကြား ဌာနတစ်ခုလုံး၏ ရုံးချုပ်ဖြစ်သည်။ ၂၀၀၈ ခုနှစ်တွင် ရန်ကုန်မှ ပြောင်းရွှေ့ခဲ့ခြင်းဖြစ်သည်။ တပ်ကုန်းမြို့၏ အနောက်မြောက်ဘက် ၄ မိုင်ခန့်အကွာ သော်တာကျေးရွာအနီးတွင် တည်ရှိသည်။
- မိုးကောင်းဘုရား
- တပ်ကုန်းမြို့မြောက်ဘက်အဝင် ရန်ကုန်-မန္တလေးအဝေးပြေးလမ်းမကြီးဘေးတွင် တည်ရှိသည်။ အလောင်းမင်းတရားကြီး ဦးအောင်ဇေယျလက်ထက်က စစ်ချီရာတွင် စခန်းချတစ်ထောက်နားသည့်ကုန်းပေါ်တွင် တည်ထားသည်ဟု ဆိုကြသည်။ "တပ်ကုန်း" ဟူသည့်အမည်သည်လည်း ထိုမှဆင်းသက်လာဖွယ်ရှိသည်။ မိုးနည်းသည့်နှစ်များတွင် မိုးရွာစေရန် ဆုတောင်းကြသည့်ဘုရားဖြစ်သောကြောင့် မိုးကောင်းဘုရားဟု တွင်ကြောင်း ဆိုကြသည်။
- ဗျိုင်းအင်းဆုတောင်းပြည့်ဘုရား
- တပ်ကုန်းမြို့၏ အရှေ့ဘက် ၃ မိုင်ခန့်အကွာ ဗျိုင်းအင်းကျေးရွာအနီးတွင် တည်ရှိသည်။ ဘုရားလောင်း ကျွဲမင်းနှင့် ဒေဝဒတ်ကျွဲမင်းတို့ ယှဉ်ပြိုင်ခဲ့ကြသည့်နေရာအနီးရှိအင်းဖြစ်၍ "ပြိုင်အင်း" ဟုခေါ်ရာမှ နောင်တွင် "ဗျိုင်းအင်း" ဖြစ်လာသည်ဟု ဆိုကြသည်။
- မဟာမြတ်မုနိဘုရား၊ ညောင်လွန့်
- တပ်ကုန်းမြို့၏ မြောက်ဘက် ၈ မိုင်ခန့်အကွာ ညောင်လွန့်ကျေးရွာတွင် တည်ရှိသည့် ရသေ့ကြီးဦးခန္တီ တည်ထားကိုးကွယ်ခဲ့သော ရုပ်ပွားဆင်းတုတော်ကြီးဖြစ်သည်။ နှစ်စဉ် တန်ဆောင်မုန်းလပြည့်ကျော် ၁၁ ရက်မှ ၁၅ ရက်နေ့အထိ ဘုရားပွဲကျင်းပလေ့ရှိသည်။
- ဦးခန္တီအိမ်တော်ရာဘုရား၊ ပျော်ရွာ
- တပ်ကုန်းမြို့နယ်၊ ညောင်လွန့်ကျေးရွာ၏ အနောက်ဘက် ၃ မိုင်ခန့်အကွာ ပျော်ရွာနှင့်ပိတောက်ကုန်းကျေးရွာအနီးတွင် တည်ရှိသည်။ ရသေ့ကြီး ဦးခန္တီ၏ မွေးဖွားရာဇာတိဖြစ်သည့် ရမည်းသင်းမြို့နယ်၊ ရွာသာရွာဟု ဆိုကြသည့်နေရာဖြစ်သည်။ ယခုအခါ တပ်ကုန်းမြို့နယ်အတွင်း ပါဝင်ပြီး ရွာသာရွာမှာမူ ပျောက်ကွယ်သွားပြီ ဖြစ်သည်။
- သားခိုတောင်ဘုရား၊ အုန်းပင်
- မဟာသိမ်တော်ကြီးဘုရား၊ ညောင်ကိုင်း
အထင်ကရ ပုဂ္ဂိုလ်များ
- ခန္တီ၊ ဦး၊ ရသေ့ကြီး (ထေရဝါဒ ဗုဒ္ဓဘာသာ သာသနာပြုပုဂ္ဂိုလ်) [၆]
- ညောင်လွန့်တောရဆရာတော် (ေရဝါဒဗုဒ္ဓဘာသာ သံဃာတော် ရဟန္တာ မထေရ်ကြီး) [၇]
- တောင်တွင်းကြီး ကိုကိုကြီး - စာရေးဆရာ (၁၉၃၁-၁၉၈၁)
ကိုးကား
Wikiwand - on
Seamless Wikipedia browsing. On steroids.
Remove ads