မြန်မာ့ရေနံနှင့် သဘာဝဓာတ်ငွေ့လုပ်ငန်း

မြန်မာ့​ရေနံနှင့် သဘာဝဓာတ်​ငွေ့ လုပ်ငန်း (အင်္ဂလိပ်: Myanma Oil and Gas Enterprise) သည် စွမ်းအင်ဝန်ကြီးဌာန လက်အောက်ရှိ စွမ်းအင်ဆိုင်ရာ အဖွဲ့အစည်းတစ်ခုဖြစ်သည်။

မြန်မာ့ရေနံနှင့် သဘာဝဓာတ်ငွေ့လုပ်ငန်း

မြန်မာအစိုးရအဖွဲ့အစည်း
အစိုးရအဖွဲ့အစည်း အကျဉ်းချုပ်
ဌာနချုပ်	နေပြည်တော်
ဝန်ကြီးများ	ဦးကိုကိုလွင်
ဌာနအကြီးအမှူးများ	​၊ ဦး​ဆောင်ညွှန်ကြား​ရေးမှူး
မိခင်အဖွဲ့အစည်း	လျှပ်စစ်နှင့်စွမ်းအင်ဝန်ကြီးဌာန
ဝက်ဘ်ဆိုက်	moee.gov.mm

သမိုင်းကြောင်း

၁၉၆၃-ခုနှစ်မတိုင်မီ မြန်မာနိုင်ငံ၏ရေနံလုပ်ငန်းအား နိုင်ငံခြားကုမ္ပဏီများကသာ ဆောင်ရွက်ခဲ့သည်။ ယင်းကုမ္ပဏီများအနက် ဘီအိုစီရေနံကုမ္ပဏီသည် အကြီးဆုံးကုမ္ပဏီတစ်ခုဖြစ်သည်။ ၁၉၆၃-ခုနှစ်၊ ဇန်နဝါရီလ ၁ ရက်နေ့တွင် ဘီအိုစီကုမ္ပဏီအား ပြည်သူပိုင်သိမ်းပြီးနောက်ပိုင်းမှ စတင်၍ ရေနံလုပ်ငန်းသည် နိုင်ငံပိုင်လုပ်ငန်းဖြစ်လာခဲ့သည်။ ၁၉၆၄-ခုနှစ်၊ မတ်လတွင် ပြည်သူ့ရေနံလုပ်ငန်း(ပရလ)၊ ၁၉၇၀-ခုနှစ်၊ မတ်လတွင် မြန်မာ့ရေနံကော်ပိုရေးရှင်း(M.O.C) စသည့်အမည်များဖြင့် လုပ်ငန်းများဆောင်ရွက်ခဲ့ပြီး ၁၉၈၉ ခုနှစ်တွင် ယခုလက်ရှိအမည်ဖြစ်သော မြန်မာ့ရေနံနှင့် သဘာဝဓာတ်ငွေ့လုပ်ငန်း(M.O.G.E) အမည်သို့ ပြောင်းလဲခဲ့သည်။

လုပ်ငန်းတာဝန်

မြန်မာ့ရေနံနှင့်သဘာဝဓာတ်ငွေ.လုပ်ငန်း၏ အဓိက လုပ်ငန်းတာဝန်များမှာ

• ကိုယ်ပိုင်အရင်းအမြစ်များဖြင့် ရေနံနှင့်သဘာဝဓာတ်ငွေ့ ရှာဖွေတူးဖော်ထုတ်လုပ်ခြင်း၊
• သဘာဝဓာတ်ငွေ့ပိုက်လိုင်းများ တည်ဆောက်၍ ပြည်တွင်းသုံးသဘာဝဓာတ်ငွေ့ ဖြန့်ဖြူးခြင်း၊
• မော်တော်ယာဉ်များအတွက် စီအင်ဂျီဓာတ်ငွေ့အား အစားထိုးလောင်စာအဖြစ် ဖြန့်ဖြူးခြင်း၊
• နိုင်ငံခြားရေနံကုမ္ပဏီများနှင့် ထုတ်လုပ်မှုအပေါ် ခွဲဝေခံစားရေးစာချုပ်များချုပ်ဆို၍ အကျိုးတူ ပူးပေါင်းဆောင်ရွက်ခြင်းနှင့် ယင်းတို့၏လုပ်ငန်းများအပေါ် ကြီးကြပ်ကွပ်ကဲခြင်း တို့ဖြစ်သည်။

ဖွဲ့စည်းပုံ

မြန်မာ့ရေနံနှင့်သဘာဝဓာတ်ငွေ့လုပ်ငန်း၏ အကြီးအကဲမှာ ဦးဆောင်ညွှန်ကြားရေးမှူးဖြစ်ပြီး ဦးဆောင်ညွှန်ကြားရေးမှူး၏ လက်အောက်တွင် ဌာနကြီး(၉)ခုနှင့် စီမံအုပ်ချုပ်မှုအရ ရေနံမြေ (၁၁)ခု ဖွဲ့စည်းထားသည်။ ဌာနကြီး(၉)ခုမှာ

1. စီမံရေးဌာန
2. အထွေထွေစီမံခန့်ခွဲရေးဌာန
3. ဘဏ္ဍာရေးဌာန
4. ရှာဖွေရေး/ဖွံ့ဖြိုးရေးဌာန
5. ကမ်းလွန်ရှာဖွေရေးဌာန
6. တူးဖော်ရေးဌာန
7. ထုတ်လုပ်ရေးဌာန
8. အင်ဂျင်နီယာလုပ်ငန်းဌာန
9. ပစ္စည်းစီမံဌာန တို့ဖြစ်သည်။

စီမံအုပ်ချုပ်မှုအရ စုစည်းထားသည့် ရေနံမြေများမှာ

1. သာကြီးတောင်-စပယ်ရေနံမြေ
2. ကျောက်ခွက်-လက်ပံတို-အရာတော်ရေနံမြေ
3. ချောက်-လမ်းရွာရေနံမြေ
4. ရေနံချောင်းရေနံမြေ
5. မန်းရေနံမြေ
6. ထောက်ရှာပင်-ထန်းကိုင်း-ကမ်းနီရေနံမြေ
7. ပြည်တောင်တန်းရေနံမြေ
8. မြန်အောင်-ရွှေပြည်သာရေနံမြေ
9. အဖျောက်ရေနံနှင့်သဘာဝဓာတ်ငွေ့မြေ
10. ညောင်တုန်းရေနံနှင့်သဘာဝဓာတ်ငွေ့မြေ တို့ဖြစ်သည်။

^[၁]

လက်ရှိလုပ်ငန်းဆောင်ရွက်မှုအချက်အလက်များ

အကြောင်းအရာ	အရေအတွက်
ဝန်ထမ်းအင်အား	၁ သောင်းခန့်
ကုန်းပိုင်းတစ်နေ့ပျှမ်းမျှထုတ်လုပ်မှု	ရေနံ စည် ၇၅၀ဝ ခန့် သဘာဝဓာတ်ငွေ. ကုဗပေ ၆၅ သန်းခန့်
တွင်းတူးစက်	ပေနက် : ၄ စက် ပေလတ် : ၇ စက် ပေတိမ် : ၁၆ စက်
သဘာဝဓာတ်ငွေ့ပိုက်လိုင်းအရှည်	၁၇၈၆ မိုင်
စီအင်ဂျီဓာတ်ငွေ့ဆိုင်	၄၅ ဆိုင်
စီအင်ဂျီပြောင်းလဲသည့်ယာဉ်ပေါင်း	၂၇၄၇၂ စီး
ပြည်တွင်းသဘာဝဓာတ်ငွေ့ဖြန့်ဖြူးမှု	နေ့စဉ်ကုဗပေသန်း ၂၅၀ ခန့်

ပိတ်ဆို့အရေးယူခံရမှု

၂၀၂၃ ခုနှစ် အောက်တိုဘာ ၃၁ ရက်နေ့တွင် မြန်မာ့ရေနံနှင့်သဘာဝဓာတ်ငွေ့လုပ်ငန်း အား အမေရိကန်၊ ဗြိတိန် နှင့် ကနေဒါ နိုင်ငံတို့က ပူးပေါင်းပြီး ပိတ်ဆို့အရေးယူမှုပြုလုပ်သည်။ ၂၀၂၃ ဒီဇင်ဘာ ၁၅ရက်တွင် စတင်အသက်ဝင်မည့် ယင်းပိတ်ဆို့မှုတွင် ဘဏ်စာရင်းဖွင့်လှစ်မှု၊ ချေးငွေ ထုတ်ချေးမှု၊ အာမခံလုပ်ငန်း၊ ရင်းနှီးမြှုပ်နှံမှုအပါအဝင် အခြားဝန်ဆောင်မှုများ ပေးခြင်းတို့ တားမြစ်ကြောင်း အချက်များ ပါဝင်သည်။ ^[၂]