Santander

Santander er ein hamneby og hovudstaden i den autonome regionen Cantabria på nordkysten av Spania mellom Asturias i vest og Baskarland i aust. Byen har kring 180 000 innbyggjarar, om lag ein tredjedel av innbyggjarane i Cantabria.

Santander
Flagget til Santander Byvåpenet til Santander
Plassering
Styresmakter
Land	Spania
Autonom region	Cantabria
Provins	Cantabria
Grunnlagd	26 fvt.
Borgarmeister	Íñigo de la Serna
Geografi
Flatevidd  - By	35 km²
Innbyggjarar  - Totalt (2008)    - folketettleik	183 466   5 241,9 /km²
Koordinatar	43°27′N 3°48′W
Høgd over havet	15 moh
Diverse annan informasjon
Postnummer	39001-39012
Nettstad: portal.ayto-santander.es

Historie

Santander, om lag 1590 - av Joris Hoefnagel.

Under Romarriket var byen kjend som Portus Victoriae Iuliobrigensium. Det noverande namnet kjem frå St. Emeterio (Santemter, Santenter, Santander), ein martyr som i følgje ei segn fekk hovudet avhogd og ført hit på 200-talet, i lag med hovudet til St. Celedonio.^[1]

I 1187 gjorde kong Alfonso VIII abbeden av San Emeterio til herre i byen og i 1248 deltok Santander i slaget om Sevilla. Som løn for dette fekk byen byvåpen.

Byen vart grunnlagd ved dei flotte hamnetilhøva i Santanderbukta. Santander var ein viktig hamneby for Castilla seint i mellomalderen og dreiv handel med Den nye verda. Han fekk offisielt bystatus i 1755.

Palacio de la Magdalena

I 1894 gjekk frakteskipet «Cabo Machichaco» i lufta ved hamna og 500 menneske miste livet.

Tidleg på 1900-talet vart Santander ein populær sommarferiestad for kong Alfonso XIII, som bygde Palacio de la Magdalena som residens for kongefamilien. Byen vart populær på grunn av dette og ein viktoriansk entusiasme for bading i havet. Han er framleis ein populær feriestad.

Storbrannen i 1941

Santander vart råka av ein storbrann i 1941. På grunn av kraftig sønnavind varte brannen i to dagar. Berre ein mann miste livet, ein brannmann i teneste, men tusenvis av familiar vart heimlause og byen glei inn i kaos.

Då det heile var over var den historiske delen av Santander nesten heilt øydelagd. Brannen øydela det meste av mellomalderbydelen og utsletta den romanske katedralen.

Kjende personar frå Santander

• Severiano Ballesteros (1957–2011), golfspelar
• María Gutiérrez Blanchard (1881–1932), målar
• Matilde Camus (1919-2012), diktar
• Iván Helguera (f. 1975), fotballspelar
• Pedro Munitis (f. 1975), fotballspelar
• Eduardo Noriega (f. 1973), skodespelar
• Iván de la Peña (f. 1976), fotballspelar
• Fernando San Emeterio (f. 1984), basketballspelar

Bakgrunnsstoff

Wikimedia Commons har multimedia som gjeld: Santander

• Offisiell nettstad

Kjelder

• Denne artikkelen bygger på «Santander, Cantabria» frå Wikipedia på engelsk, den 31. oktober 2009.
  • Wikipedia på engelsk oppgav desse kjeldene:

1. Catholic encyclopedia: Santander