Apples and Oranges

«Apples and Oranges» er den tredje singelen til Pink Floyd. Han kom ut i 1967 og er den siste singelen deira skriven av Syd Barrett.^[2][3] B-side var «Paint Box», skriven av Richard Wright. Songen omhandlar ei jente som forteljaren møter på supermarknaden. Det er ein av få songar av Pink Floyd som handlar direkte om kjærleik.

Apples and Oranges av Pink Floyd
B-side	«Paint Box»
Språk	engelsk
Utgjeve	18. november 1967
Innspelt	26. og 27. oktober 1967
Sjanger	Psykedelisk pop[1]
Lengd	3:08
Selskap	Columbia (EMI) (UK)
Komponist	Syd Barrett
Tekstforfattar	Syd Barrett
Låtskrivar(ar)	Syd Barrett
Produsent	Norman Smith
Pink Floyd-kronologi
«Flaming» (1967)	Apples and Oranges	«It Would Be So Nice» (1968)

Pink Floyd, i lag med Barrett, mima til songen å den første framsyninga i USA på American Bandstand. Etter at Barrett vart erstatta av David Gilmour vart det spelt inn ein promofilm på ein fruktmarknad i Belgia der Waters mimer til songen.

Dette var den første singelen deira som ikkje nådde lista i Storbritannia, og det amerikanske selskapet deira, Tower Records gav ut ein annan singel i USA, «Flaming». Waters gav Norman Smith skulda for det dårlege salet: «'Apples and Oranges' vart øydelagd av produksjonen. Det er ein jævla god song.»^[4]

Begge sider av singelen var miksa i stereo, men singelen vart gjeven ut i mono. Stereomiksen av «Paintbox» kom sidan ut på Relics i 1971 og begge songane finst i stereo på samlinga Masters of Rock frå 1974.

Syd Barrett sa sjølv om songen: «Det er ein gladsong med ein snert av jul. Han handlar om ei jente eg såg vandrande rundt i byen, i Richmond.»^[5]

Medverkande

• Syd Barrett – elektrisk gitar, solovokal
• Richard Wright – Hammondorgel, elektrisk piano, piano, korvokal, solovokal (mellomspel)
• Roger Waters – bassgitar, korvokal
• Nick Mason – trommer, tamburin