Bangsia

Bangsia er ei biologisk slekt av sporvefuglar i tanagarfamilien, Thraupidae. Leveområdet er nær Andes i Ecuador og i Colombia, og i Panama og Costa Rica.

Bangsia
Gullringtanagar, Bangsia aureocincta Foto: Franscesco Veronesi
Systematikk
Rike:	Dyr Animalia
Rekkje:	Ryggstrengdyr Chordata
Underrekkje:	Virveldyr Vertebrata
Klasse:	Fuglar Aves
Overorden:	Passerimorphae
Orden:	Sporvefuglar Passeriformes
Familie:	Tanagarar Thraupidae
Slekt:	Bangsia T.E. Penard, 1919

Det er fem eller seks artar i denne slekta avhengig av taksonomisk standpunkt.^{[note 1]}

Skildring

Bangsia-tanagarar har likeins rund eller lubben kroppsbygging med nokså kort hale, og storleik på rundt 15 centimeter i lengd og om lag 35-45 gram i masse. Den einsfarga gulgrøne gursetanagarsporv er noko mindre, ca. 14 cm. Fjørdraktene til dei fem andre artane har fleire farger, grønt, gult blått og svart i varierande mønster. Gullbrysttanagar er ein mørk art med djup mørk marineblå til svart fjørdrakt som har ein eit gult eller orange felt over brøstet og gul undergump. Gullringtanagar og blåkinntanagar har lysare drakt i grønt og blått. Solbuktanagar har mørk blå overside og gul underside. Kjønna hos desse artane har lik eller nesten lik utsjånad, gullringtanagar og solbuktanagar syner marginal kjønnsdimorfisme. Nebbet er kraftig.

Føda er i stor grad frukt med innslag av leddyr.

Leveområdet for desse tanagarane ligg typisk i høgder mellom 250 og 2200 moh. i fuktige habitat langs vestsida av Andes frå nordlegaste Ecuador og nordover i Colombia til sørlege Antioquia-departementet. Solbuktanagar skil seg i utbreiing frå dei andre artane, arten lever i høgder mellom 300 og 1200 moh. i ei stripe vendt mot Karibia langs Panama og Costa Rica. Kvar art har eit lite, lokalt utbreiingsområde.

Arten gullringtanagar er klassifisert som sterkt truga, caldastanagar og gursetanagarsporv som sårbare.

Artslista

Bangsia i rekkjefølgje etter EBird/Clements Checklist v2018^[1] med norske namn etter Norske navn på verdens fugler:^[2]

• Gursetanagarsporv, Bangsia flavovirens, Yellow-green tanager, Lawrence, 1867, (VU)^{[3][note 1]}
• Solbuktanagar, Bangsia arcaei, Blue-and-gold tanagar, Sclater, PL & Salvin, 1869, (NT)
• Caldastanagar, Bangsia melanochlamys, Black-and-gold tanagar, Hellmayr, 1910, (VU)
• Gullbrysttanagar, Bangsia rothschildi, Golden-chested tanagar, von Berlepsch, 1897, (LC)
• Blåkinntanagar, Bangsia edwardsi, Moss-backed tanagar, Elliot, DG, 1865, (LC)
• Gullringtanagar, Bangsia aureocincta, Gold-ringed tanagar, Hellmayr, 1910, (EN)