Bigger than Us

«Bigger than Us» (norsk 'større enn oss') er ein britisk popsong frå 2019, skriven av Laurell Barker, Anna-Khara Folin, Jonas Thander og John Lundvik. Han vert framført av songaren Michael Rice. Songen vann BBC-tevlinga Eurovision: You Decide 8. februar 2019 og var det britiske bidraget i Eurovision Song Contest 2019 i Tel Aviv i Israel.^[1] Der enda songen på sisteplass; den fjerde sisteplassen til Storbritannia i Eurovision Song Contest.

«Bigger than Us» Song av Michael Rice
Land	Storbritannia
Språk	Engelsk
Utgjeve	8. mars 2021
Sjanger	Pop, ballade, neosoul
Lengd	03:04
Selskap	Spinnup
Tekstforfattar	Laurell
Låtskrivar(ar)	Laurell Barker, Anna-Klara Folin, John Lundvik, Jonas Thander

Michael Rice framfører «Bigger than Us» under ei av prøvene i Tel Aviv i 2019.

Bakgrunn

«Bigger than Us» var blant bidraga i songtevlinga Eurovision: You Decide på BBC i februar 2019. Eit dommarpanel og tv-sjåarane valde songen til vinnar. «Bigger than Us» skulle i utgangspunktet ha delteke i Melodifestivalen 2019, framført av songaren John Lundvik. Til slutt valde Lundvik ein annan song og sende i staden «Bigger than Us» inn til Eurovision: You Decide.^[2]

Lundvik stilte opp i Melodifestivalen 2019 med songen «Too Late for Love» og vann tevlinga. Dimed konkurrerte Lundvik mot sin eigen song, «Bigger than Us», i Eurovision Song Contest 2019.^[3]

«Bigger than Us» deltok i finalen av Eurovision Song Contest laurdag 18. mai 2019 i Expo Tel Aviv. Songen hadde startnummer 16 i finalen, og avslutta på sisteplass med 11 poeng.^[4][5] Dette var fjerde gongen Storbritannia enda sist i tevlinga.^[6] Songen tok seg heller ikkje inn på den britiske singellista. Dette var fyrste gong på 55 år at eit britisk bidrag ikkje kom inn på singellista.^[7]