Chaetocercus

Chaetocercus er ei biologisk slekt av kolibriar i stammen Mellisugini, «bikolibriar». Dette er seks artar som har ei samla utbreiing i nordvestre Sør-Amerika og på Trinidad og Tobago. Utbreiingsområda deira ligg hovudsakleg i fjellregionar langs Andesfjella og nærliggande område, frå Trinidad og det nordlege Venezuela sør til det sentrale Bolivia.

Chaetocercus
Kvitbukkolibri (Chaetocercus mulsant)
Systematikk
Rike:	Dyr Animalia
Rekkje:	Ryggstrengdyr Chordata
Underrekkje:	Virveldyr Vertebrata
Klasse:	Fuglar Aves
Orden:	Seglarfuglar Apodiformes
Familie:	Kolibriar Trochilidae
Underfamilie:	Trochilinae
Stamme:	Mellisugini
Slekt:	Chaetocercus G. R. Gray, 1855

Det maskuline slektsnamnet Chaetocercus kjem frå gresk khaitē som tyder ‘hår’ og kerkos som tyder ‘hale’, altså «hårete hale».^[1]

Kjenneteikn

Kolibriane i denne slekta er svært små, 5,5 til 8,5 centimeter lange der hannfuglar er ca. 1 cm lengere enn hoer. Dei har kort, rett eller svakt bøygd nebb og to kvite sideflekker på undersida som er forbunde med ei linje over dei stjertdekkande fjørene. Hannane har ein skinande raudfiolett strupeflekk kanta av eit kvitt, grått eller beige brystband, grøn overside og anten grøne eller kvite undersider. Hoene har mørkebrune øyrefjører og ei lang, lys stripe bak auga, grøn overside og beige eller kvit underside. Hannane har ein kløyvd stjert med svært smale fjører, medan hoene har ein kortare og noko avrunda stjert. Flukta deira er målretta og minnar om humler.^[2]

Systematikk

Slekta Chaetocercus vart føreslått av den britiske zoologen George Robert Gray i 1855.^[3] Typearten, som først vart definert ved monotypsi, var Ornismya jourdanii, no kjend som Chaetocercus jourdanii, rustskaftkolibri.

Artsoversyn

Slekt Chaetocercus i rekkjefølgje etter IOC World Bird List V15.1, 2025,^[4] med norske namn etter Norske navn på verdens fugler:^[5]

Bilete	Norsk namn	Vitskapleg namn	Autor	Utbreiing	Status[6]
	Kvitbukkolibri	Chaetocercus mulsant	(Bourcier), 1843		LC
	Pygmékolibri	Chaetocercus bombus	Gould, 1871		NT
	Knøttkolibri	Chaetocercus heliodor	(Bourcier), 1840		LC
	Santamartakolibri	Chaetocercus astreans	(Bangs), 1899		LC
	Esmeraldaskolibri	Chaetocercus berlepschi	Simon, 1899		VU
	Rustskaftkolibri	Chaetocercus jourdanii	(Bourcier), 1839		LC